Accessibility links

җомга, 9 декабрь 2016, Казан вакыты 07:07

"Newsweek" ğafu ütenä - Qör''änne mäsxäräläw turındağı xäbär tikşerelmägän ide


Quşma Ştatlarda çığa torğan "Newsweek" mäcmuğası yäkşämbedä, üzeneñ amerikan xärbiläre Guantanamoda Qör''än Kärimne mäsxärälägän digän xäbärendä yalğışlar buluın tanıp, alar öçen ğafu ütende. "Newsweek"neñ şuşı xäbäre uzğan atnada bar möselman dönyasında, ayırım alğanda Pakstan, Äfğanstan, fälästin cirlärendä uram çualışlarına kitergän ide. Äfğanstanda alar kimendä 15 keşeneñ ülüenä dä kiterde. "Newsweek" möxärrire xäzer şul ülemnär uñayınnan ükeneçen belderä.

Guantanamodağı amerikan xärbiläreneñ möselman totqınnarğa basım yasaw çarası itep Qör''än Kärimne mäsxäräläwe turındağı xäbär "Newsweek"ta maynıñ 9-ında dönya kürgän ide. Berniçä cömlälek kenä buluına qaramastan şul yazma bar möselman dönyasında näfrät dulqını uyatıp, Äfğanstan, Pakstan, İndoneziä kebek illärdä, fälästin cirlärendä zur uram cıyınnarına kiterde. "Newsweek" xäbärendä, amerikannar möselmannarnıñ izge kitabın bädräflärgä quyıp, ber oçraqta anı xätta su belän yuwıp ta töşergän dielgän ide. Xäzer inde mäcmuğa möxärrirläre, şuşı mäğlümatnıñ yalğış ta bula aluı xaqında belderä. "Newsweek"neñ Washingtondağı idaräse mödire Dan Klaidman yäkşämbedä bolay dip dide:

Audio, Dan Klaidman

"Bez bu mäğlümatnı tieşle däräcädä tikşerdek tä kebek, ämma qaywaqıt yalğışlar barıber kitkäli häm bu oçraqta da, bezneñçä, şulay buldı" dip añlata Qör''änne mäsxäräläw turındağı çetrekle xäbärneñ döreslekkä turı kilä almawın "Newsweek" möxärrirlärennän berse. 9-nçı may sanında dönya kürgän mäğlümatnı şuşı mäcmuğa, amerikan xakimiatendäge ışanıçlı çığanaqqa tayanıp bäyän itkän ide, xäzer inde şul çığanaq, Qör''änne mäsxäräläw oçrağı turında üzeneñ alay uq ışanıçlı itep äytä almawın beldergän. "Newsweek" citäkçeläre süzlärenä qarağanda, şuşı yazmanı äzerlägän xäbärçelär Michael İsikoff häm John Barry, anı bastıru aldınnan saqlanu ministrlığındağı ike räsmi wäkilneñ fikeren sorağan bulğan. Şularnıñ berse cawap birüdän baş tartqan, ikençese üz fikeren yazmanıñ bötenläy başqa ber öleşenä qarata äytkän, ä menä Qör''änne mäsxäräläw turındağı mäğlümatqa qarata anıñ qarşılığı bulmağan. "Newsweek" kierenkelek tudırğan şuşı xäbäre tiräsendäge wäzğiatne küzätep baraçağın belderä, ä inde şunıñ arqasında uram cıyınnarı, xätta ülemnär kiçergän Äfğanstannıñ räsmi wäkilläre, xäbärneñ xata buluın, döreslekkä turı kilmäwen tanu ildäge kierenkelekne kimetügä yardäm itär dip ömetlänä. Prezident Xämit Qarzaynıñ matbuğat wäkile Cäwid Ludin bu uñaydan mäğlümat çaralarınıñ çetrekle mäs''älälärne yaqtırtu eşenä cawapsız qarawın tänqitli:

Audio, Cäwid Ludin

"Döres xäbär birü prinsiplarınıñ tieşençä totılmawına bezneñ bik açu kilä, älbättä. Beryaqtan, alarnıñ üz xatasın tanuı bik döres, çönki bu çınnan da möhim ber problema ide häm xatanı tanu şul problemanı yuqqa çığara. Ämma şundıy çetrekle mäs''älädä jurnalizm standartlarınıñ bik tübän buluı cawapsızlıqnı kürsätä" di Äfğanstan prezidentınıñ matbuğat wäkile Cäwid Ludin. Räsmi Qabul, "Newsweek" bastırğan şikle mäqäläne ildä çualışlar çığaru maqsatında çittän kilgän zatlar qullandı dip belderä. Anda inde berniçä çit il keşese qulğa alınğan dip xäbär itelä.

Kärim Kamal
XS
SM
MD
LG