Accessibility links

якшәмбе, 4 декабрь 2016, Казан вакыты 02:56

Buınnardan küçkän yaratu


Bu könnärdä Sverdlovski ölkäseneñ Ärtä rayonı, Äceğol awılında zur bäyräm bulıp uzdı. Äceğol klubında “Buınnardan küçkän yaratu” digän isem astında Qazannıñ meñyıllığına bağışlanğan zur kürgäzmä açıldı. Kürgäzmädä mäktäp uquçıları, kübesençä “Kübäläk” fol'klor ansamblendä qatnaşuçı balalar qulı belän yasalğan äyberlär urnaştırılğan. Ansambl'neñ citäkçese Ğäliä xanım Zäynullina bu kürgäzmäne oyıştıruda bik zur köç quyğan keşe.

Biredä tatar tormışına, Qazanğa bağışlanğan räsemnär genä tügel, tegelgän, çigelgän äyberlär dä küp. Balalar üz qulları belän asılmalı bişek, ağaçtan sırlap eşlängän karawat kebek qatlawlı äyberlär dä yasağannar. Alarnı çigüle çıbıldıqlar belän yapqannar, yoqlarğa salınğan näni qurçaqlar da kübese alarnıñ üz qulları belän yasalğan. Qurçaqlarğa milli kiemnär tegep kidergännär. Şunda uq “Qartänilärneñ yöräk cılısı” digän bülek tä bar. Bu bülektä kübräk törle bizäklär belän bizälgän bäyläm äyberläre, çeltärlär.

Ärtä rayonında tatar awılları bik küp tügel, barmaq belän sanarlıq öç-dürt kenä. Ämma tatar mädäniäten, tatar ğöref-ğadätlären bik yaxşı belälär rayon üzägendä. Monda Äceğol awılı mäktäbe uqıtuçılarınıñ role bik zur. Uqıtuçı Mäwcidä xanım Bigijanova bezgä yıl sayın törle kürgäzmälär oyıştıruları turında söyläde. Älege kürgäzmälär başlıça tatar xalqınıñ milli üzençäleklärenä, könküreşenä bağışlana. Başqa millät wäkillärendä xörmät uyatırlıq çista, matur, zur zäwıq belän başqarılğan eşlär saylap alına.

Mäwcidä xanım söyläwençä, rayon buyınça uzdırılğan küp törle bäygelärdä äceğollılar gel prizlı urınnarnı ğına alıp kilälär. Menä küptän tügel tuğızınçı sıynıfta uquçı ber qız bala şundıy konkurslarnıñ bersenä tatar qalfağı çigep äzerlägän, anıñ turında referat ta yazğan häm ikençe urınnı aluğa ireşkän. Ä inde “Kübäläk” fol'klor balalar ansamble rayon eçendä genä çığışlar yasap qalmıy, ölkä külämendä dä rayonnıñ däräcäsen tota.

Açılu tantanasına da “Kübäläklär” bik matur çığış äzerlägännär. Zalda cıyılğan xalıq arasında awıldaşlar ğına tügel, rayon xakimiäte wäkilläre häm Yekaterinburg qunaqları da bar ide. Äytergä kiräk, bu kürgäzmäne oyıştıru häm anıñ näticälären yomğaqlaw çığımnarın tulısınça Milli Media-Xolding citäkçeläre üz öslärenä aldı. Alar berençe dürt urınnı aluçılarğa prizlar, kürgäzmägä äyberlär yasarğa qatnaşqan här balağa, bulışqan äni-äbilärgä, ansambl'neñ citäkçese Ğaliä Zäynullinağa häm bayançı Marat Bäyrämovqa büläklär alıp kildelär.

Säxnä bizäleşe dä, çığışlar da tuğan şähärebez Qazanğa bağışlanğan ide Kürgäzmä “Buınnardan küçkän yaratu” dip yuqqa ğına atalmağandır axırı. Äceğol awılında yäşäwçelärneñ bik azı ğına Qazan şähären kürep belä. Ber tapqır da kürmägän kileş şulqädär yöräk cılısın birep yasağanğamı, biredäge äyberlärdän ällä nindi cılılıq, nur börkelep tora sıman. Ä Qazan turında alar tatar tele däreslärendä öyrängännär.

“Kübäläk” balaları inde küptän Qazanğa barıp qaytu turında xıyallanalar. Söyläşä torğaç, bu xıyal balalarda ğına tügel, olılarda da yäşi ikänlege açıqlandı. – “Ğömerem buyı Äceğolda yäşim, Qazannı ber tapqır da kürgänem yuq, - di Mäwcidä xanım da, - Qazan bezneñ öçen iñ qäderle şähär ul. Çaqırığız äle bezne dä Qazanğa!”

Kiçä bik eçtäşlekle, küñelle bulıp uzdı. Axırdan balalar belän bergä “Kübäläk” ansambleneñ citäkçese Ğäliä xanım Zäynullina Milli Media-Xolding citäkçelärenä bik zur räxmät belderde.



Äceğol awılına bıyıl 450 yäş tula dilär. Bu ğäcäyep awılda eşçän, tırış, şiğri küñelle, icadi xalıq yäşi. Yaqtaşları artistlar Säğit Gıyybaşev, İl'yas Wälişah, Qazan aviatsiä zavodında konstruktor bulıp eşläwçe Cäwdät Mindiärov, Mäskäwdä kosmonavtika ölkäsenä qarağan predpriätielärneñ bersen citäkläwçe konstruktor Rinat Zäynullinnar belän çiksez ğorurlanalar alar. Kiler ber waqıt, çal Uralnıñ yıraq ber poçmağına posıp utırğan ğap-ğadi tatar awılınnan tağın da tanılğan şäxeslär üsep çığar. Bügenge “Kübäläk” ansamblendäge talantlı balalar, ölkä konkursları lawreatları biyuçelär Linarit häm Vinarit Wälişewlar, cırçı häm biyuçe Ruzanna Gaynizamanovalar isemnäre yıraqlarğa yañğırar. Uqıtuçıları, Ğaliä apaları, äti-äniläre genä tügel, säxnädän çığış yasağan qunaq abıyları-apaları da şundıy ışanıç belderdelär.

Fäwiä Safiullina. Yekaterinburg.

XS
SM
MD
LG