Accessibility links

Кайнар хәбәр

“Berdäm Rusiä” saylawlarğa äzerlänä başladı kebek


Rusiädä xakimiät firqäse sanalğan “Berdäm Rusiä”dä wäzğıät ber qaraşqa ğına tınıç kebek. Çınlıqta isä, firqäne äzme-küpme eçtäge tartqalaş borçıy. Bu älbättä, başqa firqä-säyäsi xäräkätlärdäge kebek urın öçen köräş tügel. Ä fiker köräşe. Küptän tügel genä Mäskäwdä ber törkem berdämrusiälelär firqäğä eçke plyuralizm citmi, bälkem, firqä eçendä uñ fikerlär tarafdarları qanatı buldırırğa kiräkter digän fikerlär belän çığuı moña misal bulıp tora. Tatarstan prezidentı Mintimer Şäymiev tä, älege firqä liderlarınıñ berse bulıp torsa da, qayber säyäsi mäs’älälär belän kileşmägänlegen gel belderep kilä. Ämma, monıñ işe belderügä firqäneñ üzäk komitetı qolaq ta salmıy. Berdäm Rusiäneñ liderı Grıyzlov küptän tügel genä, firqä eçendä bernindi dä uñ yäki sul qanatlar bula almıy dip belderde.

Sişämbedä, “Berdäm Rusiä”neñ Tatarstan bülekçäse ştab-kvartirasında uzğan cıyılış ta, partiäneñ eçke säyäsätenä kübräk bağışlandı. Bu cıyılış, firqäneñ Tatarstan bülekçäse säyäsi sovetınıñ Konsul'tativ şurası cıyılışı dip ataldı. “İl üseşendä kilep tuğan problemnarın maqsatçan xäl itü yulları” dip atalğan cıyılışnı Tatarstan parlamentı räise Färit Möxämmätşin alıp bardı. Ul, älege firqäneñ Tatarstan bülegen citäkçese bulıp tora. Bu cıyınğa Rusiä Däwlät Dumasınıñ mäğlümatı säyäsät komitetı citäkçese urınbasarı, şulay uq “Berdäm Rusiä” firqäse äğzası Pavel Pijaylo da kilgän ide.

Färit Möxämmätşin da, Pajel Pijaylo da qatnaşuçılarnı açıqtan-açıq söyläşergä çaqırdılar. Firqäne küp närsä borçıy ikän. Şul isäptän, kiläse parlament saylawları da. Pijaylo süzlärenä qarağanda, firqä administrativ köçkä tayansa da, keçe häm urta eşmäkärlekkä tayana almıy. Çönki, xakimiät firqäse, bu tör eşmäkärlek üseşe öçen ällä ni eş maytarğanı yuq. Monnan tış, yamanatı çıqqan 122 qanun firqäneñ däräcäsen töşerä ikän. Bu, tege taşlamalarnı beterü turındağı qanun inde. Färit Möxämmätşin, firqäneñ Mäskäwdäge citäkçeläre töbäklär süzenä qolaq salmıylar. Bu qanun qabul itelgäç tä, awızları peşte digänräk süzlär citkerde. Monnan tış, profsoyuzlar, invalidlar oyışması, dini oyışmalar wäkilläre çığış yasadılar.

Alar härberse dä, firqä säyäsätenä üzgäreşlär kertergä täqdim ittelär. Älbättä, et örer, kärwan barır digändäy, bu täqdimnärgä Mäskäw qolaq salır mikän. Cıyılışta qatnaşqan Mäskäw qunağı bu söyläşü faydalı dip kenä belderde. Ä Färit Möxämmätşin isä mondıy cıyılışlarnı ay sayın ütkärergä kiräklegen äytte.

Räfis Cämdixan.

XS
SM
MD
LG