Accessibility links

чәршәмбе, 7 декабрь 2016, Казан вакыты 23:23

Gruziä belän Rusiä kierenkelekne kimetep üzara kileşüne kiräk dip taba


Yevropa Şurasınıñ Warşaw oçraşuında qatnaşqan Rusiä häm Gruziä tışqı eşlär ministrları, Rusiäneñ Gruziädäge xärbi nığıtmaların çığaru eşe tizdän yañartılaçaq digän urtaq qararğa kilde. Tiflistäge parlament, ägär dä Mäskäw maynıñ 15-enä qädär üz ğäskärlären çığaru waqıtın iğlan itmäsä, alarğa qarşı çaralar kürelä başlayaçaq dip kisätkän ide.

Tiflis belän Mäskäw arasında ber-bersenä yodrıq kizänü çorı älegä tämam kebek - gruzin yağı, wäğdä itkän qırıs çaraların - ildäge Rusiä xärbilären gaz, elektr wä su tä''minatınnan özüne älegä ğämälgä quymasqa buldı. Prezident Saakaşvilineñ matbuğat wäkile Gela Xarkviani xäzer iñ möhime söyläşülärne däwam itü dip belderde:

Audio, Gela Xarkviani

"Älegä qararğa yä urtaq qaraşqa kilenmäde, älbättä, ämma qayber täräqqiat inde bar. Xäzer iñ dörese - tınıç qına däwam itüder. Gruziä parlamentınıñ qararı köçtä qala, älbättä, läkin monıñ belän bergä söyläşülär dä däwam itä. Häm monıñ cimeşlär kiterüe bik mömkin. Bälkem dä şuşı eşneñ däwam itterelüe öçen bez şartlar tudıra alırbız" di Mixail Saakaşvilineñ matbuğat wäkile. Warşawğa kilgän Sergey Lavrov, Rusiä tışqı eşlär ministrı, üz xökümäteneñ Gruziädäge ğäskärlärne çığaru mäs''äläsendä qararğa kilüenä işarä yasasa da, töp soraw bulıp monıñ qayçan eşlänäçäge qala. Tiflis üzendäge Rusiä xärbiläreneñ ildän iñ soñı digändä dä, 2008-neñ ğinwarenä qädär kitüen teli. Mäskäw isä, moña kimendä 7 yıl, häm äle östämä finans kompensatsiä kiräk bulaçaq dip belderep kilgän ide. Warşawda isä Rusiä tışqı eşlär ministrlığı wäkile Aleksander Yakovenko, Rusiä xäzer gruzin yağına dürt yıllıq ber kompromiss täqdim itte dide. Mäskäwdäge Carnegie üzägennän Aleksey Malaşenko, Gruziä ziräklek kürsätep şuşı täqdim belän kileşä ala dip isäpli.

Audio, Aleksey Malaşenko

"Minemçä bu qabul itärlek ber çor. Häm monda Tiflisne tübänsetkän bernärsä dä yuq. Annarı, ğäskärlärne qaya küçerü, qaya urnaştıru probleması da bar bit äle. Qayber mäğlümatqa qarağanda, Rusiädä yaña nığıtmalar qoru 150 dä, 300 million dollarğa da töşä ala, bu çınnan da bik zur ber xucalıq probleması bulıp tora" di Aleksey Malaşenko. Başqa küzätüçelär, bigräk tä gruzin yağında, Rusiä ğäskärlären çığaru ni öçen şul xätle qibatqa töşä soñ digän soraw quya häm, Mäskäw şulay itep wäzğiatne üzeneñ mämläkätçel ımsınularınnan arına almawı säbäple qatlawlandıra dip isäpli. Gruziäneñ tışqı eşlär ministrı Salome Zurabişvili bolay di:

Audio, Salome Zurabişvili

"Alar, yäğni Rusiä yağı, haman da çınbarlıqnı tanıy almıy, üzläreneñ inde tirä-yündäge illärne kontrol'' itkän imperialistik däwlät bulmawın qabul itärgä telämi. Bu alarnıñ Gruziäne tulısınça bäysez däwlät bularaq kürmäwen añlata. Alar asılda üzläreneñ şul fikerläwe, üz-üzläre belän köräş alıp bara" di Rusiäneñ Gruziädäge ğäskärlären çığaru mäs''äläsendä totqan qaraşları turında gruzin tışqı eşlär ministrı Zurabaşvili. Ul şulay uq, Gruziä Rusiäneñ açulı kürşe tügel, ä dus buluın teli dip belderä. Ä älegä Tiflistä olı qunaq itep Vladimir Putinne tügel, ä amerikan prezidentı Bushnı qabul itälär, gruzin ğäskärilären xäzer amerikannar öyrätä, yäşlär anda urıs tügel, ingliz telen öyränä. Ämma xaqiqat şul ki, Gruziäneñ qapqa töbendä Quşma Ştatlar da, Yevropa Berlege dä tügel, ä Rusiä tora.

Kärim Kamal
XS
SM
MD
LG