Accessibility links

җомга, 9 декабрь 2016, Казан вакыты 07:05

Omskilılar Tubıl pedagogiä institutnıñ rus-tatar bülege yubileenda qatnaştılar.


Şuşı könnärdä genä Qazan, Tömän, Omski, Alabuğa, Stärletamak häm başqa şähärlärdän kilgän ğalimnär häm küp sanlı qunaqlar qatnaşlığında Tubıl Däwlät pedagogiä institutınıñ rus-tatar bülege açıluınıñ 50, qabat yañartıluınıñ 15 yıllığı tantanalı räweştä bilgelände. Mäğlüm ki, älege bülektä Omski ölkäsennän dä belem aldılar, ayıruça bülek açılğan yıllarda.

Mäsälän, Tubıl pedagogiä institutınıñ rus-tatar bülegendä 1957-nçe 62-nçe yıllarda Mafruza xanım Zaynetdinova uqığan . Diplom alıp, tuğan awılı Ülänkülgä qaytqannan soñ ul 30 yılğa yaqın mäktäptä rus telen uqıtqan. Mafruza xanımnıñ bülek bäyrämenä barırğa teläge zur buldı, ämma sälämätlege qaqşaw säbäple, yıraq yulğa çığa almadı. Tantanağa änise kebek ük tel belgeçe hönäre saylağan, ayırma bularaq yuğarı belemne Qazan pedagogiä institutında alğan, Gölsinä Axmerova bardı.

Bülek tantanasında uzğan ğasırnıñ 50 nçe yılları urtasında tatar-rus bülegendä belem alğan uquçılar bulmadı tügel. Bäyrämgä bügenge köndä dä älege institutta eşläp toruçı Rauza xanım Sadıykova, Tubıldan yıraq bulmağan Maslovo awılında tatar tele uqıtuçısı bulıp eşläwçe Räşidä xanım Baqiewa, Tömän şähärendä icat itüçe jurnalist Bibinur xanım Sabirova häm başqalar kilgän idelär. Alarnıñ qayberläre üzläreneñ xatiräläre belän urtaqlaştı.

Qazan qunaqları - Tubıl pedagogiä institutında rus-tatar bülege açılğan yıllarda eşlägän tel belgeçläre Qazan däwlät pedagogiä universitetı professorı Färit Xatipov häm Qazan däwlät universitetı professorı Azat Äxmädullin da biredä eşlägän yıllarnı sağınıp iskä aldılar.

Tubıl pedagogiä institutınıñ rus-tatar bülegendä bügenge köndä dä Omskidan kilep uquçılar bar. Elekke yıllarda uqığannardan ayırma bularaq, xäzerge yäşlär institutnı tämamlağannan soñ, belemnären däwam itärgä niätlilär. Bıyıl diplom alğan Purexan Sıbır mäsälän, elege bülek qarşındağı aspiranturğa kerergä uylıy. Berençe kurs studentı Zölfirä Muraleewanıñ da, institutnı tämamlağannan soñ, fän belän şöğellänergä teläge bar.

Bülek mödire Flera xanım Sayfulina Omsidan kilgän yäşlär üzläreneñ tırışlıqları belän ayırılıp toralar di.

Şulay kiläçäktä dä Tubıl däwlät pedagogiä institutında rus-tatar bülege saqlanıp qalğanda, anda milli canlı uqıtuçılar eşläp torğanda Tatarstannan yıraqta da yuğarı kvalifikatsiäle tatar tele belgeçläre äzerläw däwam itär, alar millätebezneñ asıl taşları bulıp torırlar digän ömet bar.

Saniä Mirxaleewa. Omski

XS
SM
MD
LG