Accessibility links

якшәмбе, 4 декабрь 2016, Казан вакыты 05:11

Mäktäp uquçıların sanaqta eşlärgä kem öyräter?


Media-forum qısalarında, Qazanda, Tatar internetçılar cıyını da ütkärelde. Cıyılışta qatnaşuçı saytlar xucaları, xakimiät oyışmaları wäkilläre belderğänçä, soñğı ber-niçä yıl eçendä, bu ölkädä bulğan üseş sizelä. Elek kübräk berdäm standartlar, älifbalar turında fikerläşkän bulsalar, xäzer tatarça säxifälärneñ eçtälegen yaxşırtu kebek mäsälälär kütärelde.



Üseş bulsa da, forumçılar fikerençä, ul bik äkren bara. Tatarça saytlar haman da az, räsmi internet säxifälärneñ tuğan teldäge bülekläre buldırıla, ämma yañartılıp barmıy. Cıyılışta qatnaşqan, Elemtä häm informatizatsiä ministrı Färit Fazılcanov, tatar internet säxifälären yasawçılarnı tatarça «Windows» kebek zur proyektlarda qatnaşırğa çaqırdı. Ul, xäzerge waqıtta, respublikada, informatizatsiä alğı sızıqqa çığarğa tieş, dip belderde. Tatar häm urıs telle qullanuçılar arasında texnologiä yağınnan tigezsezlek bar, ministrlıq bu problemanı aldağı 2 yılda xäl itü maqsatın quya, bıyıl böten mäktäplärne global çeltärgä totaştırıp, belem birü mäydançığın buldırabız, dide.

Böten mäktäplärne çeltärgä totaştıru häm mäğlümatlaştıru ideyaları informatika uqıtuçısı Rail Ğataullinğa bik oşadı. Ul üze tatarça informatika däreslären alıp bara, şul xaqta sayt yasağan. Rail Ğataullin, belem birü çeltäre häm mäktäplärne internetqa totaştıru barışında tuğan qıyınlıqlarnı da yaxşı küz aldında kiterä. Mäktäptäge uqıtuçılarnıñ belem däräcäse tübän, xätta uquçılarğa uqıtuçılarına yärdäm itärgä turı kilä, ä yaxşı belgeçlär mäktäpkä eşlärgä barmıy, dide ul.

İnde belem birü oyışmalarına äzerlekle belgeçlär kilsä, uquçılar zamança texnologiälärne öyränsä, ul waqıtta, Tatar internetı da tizräk üsä başlar. Tatar internetçıları şundıy ömetlär belän yäşi. Prezident apparatınıñ Tışqı elemtälär departamentı xezmätkäre häm www.tatar.ru räsmi internet säxifäsen alıp baruçı Azat äfände Axtariyıv forumda qatnaşuçılarnı räsmi internet säxifälärneñ torışı belän çığıştırdı. Anıñ äytüençä, qayber ministrlıqlar, internet saytlarnı qarıy başladılar, ämma tatarça saytlarnı barıber yasamıylar. Azat äfände uylawınça, ike tellelek qanunın ütäw yözennän bulsa da, tatarça räsmi saytlarnı arttıruğa ömet bar dide. Anıñ äytüençä, Prezident idäräse citäkçese urınına yaña keşe kilgäç, xakimiät oyışmalarınıñ global çeltärdäge bitlärenä dä taläplär qırıslanaçaq, dide ul. Forumda qatnaşuçılar, äytelgän täqdimnärne tuplap rezolyutsiä qabul itte.



Bikä Timerova.

XS
SM
MD
LG