Accessibility links

Кайнар хәбәр

Mädänä awılında Tübän Novgorod ölkäseneñ tatar kitapxanäçeläre cıyıldı


Küptän tügel genä Tübän Novgorod ölkäse, Qızı Oktäber rayonı, Mädänä awılında tatar xalqına xezmät kürsätüçe kitapxanäçelärneñ seminarı uzdı. Älege çaranıñ oyıştıruçısı – Lenin isemendäge Tübän Novgorod ölkä fänni universal' kitapxanäse.

Seminarnı kitapxanä citäkçese Kuznetsova Natal'ya Anatol'yevna açıp cibärde. Ul ölkä kitapxanäseneñ uñışları, kiläçäkkä plannarı turında söyläde. Bu seminarnıñ bik tä kiräklegen, tatar xalqına xezmät kürsätüne tağın da canlandırıp cibärüne küzdä totıp oyıştırılğanın assızıqladı. Alda torğan burıçlarnı, problemalarnı bergäläp çişkändä genä uñışlarğa ireşep buluına basım yasadı. Ä problemalar bik küp ikän. Şul isäptän, xalıqnıñ tuğan telen naçar belüläre häm anı öyränergä bik zur teläkläre buluı. Dimäk, yuğarı kvalifikatsiäle uqıtuçılar citmi.

Tağın ber zur mäs'älä - tatarça kitaplarnıñ citmäwe, satuda bulğannarınıñ da yöz illeşär sumğa satıluı. Monıñ turında Qızıl Oktäber rayonı xakimiät başlığı, Tahir Xäyretdinov üz çığışında xäbär itte. Kitapxanälärne tatar kitapları belän tä'min itü problemasın iñ berençe çiratta çişü kiräklegenä basım yasadı. Monıñ öçen ul finans yärdäm wäğdä itte. Şulay bulaçağına ömetlänep, yañalıqnı zalda cıyılğan barlıq qunaqlar da köçle alqışlar belän qabul ittelär.

Kitapxanädä matur ädäbiät belän qıyınlıqlar tusa da, dini kitaplar bik küp ikän. Kitapxanäne alar belän daimi räweştä yänäşädä genä tözelgän “Räşidä” mäçete tä'min itep tora, dini bäyrämnärne dä bergä uzdıralar. Mäçet belän kitapxanä arasında bik yaxşı xezmättäşlek urnaştırılğan, älegä respublikabızda da, Rusiädä dä mondıy elemtälär ürnäkläre yuq däräcäsendä.

“Räşidä” mäçete turında da berniçä süz äytep kitäse kilä. Mäçet arxitektur yaqtan bik zur zäwıq belän tözelgän. Eçendä öç muzey bar. Berse xalqıbıznıñ tarixına, ikençese repressiälängän din ähellärenä bağışlanğan, öçençesendä ölkäneñ tabiğät üzençäleklären çağıldırğan eksponatlar urnaştırılğan. Alğa taba mişärlärneñ geroik zatları häm İslam dine muzeyları açu planlaştırıla.

Bezgä Sergaç tatarlarınnan bik küp uñay täcribä alırğa mömkin. Misal öçen, Mädänä awılında tuıp üskän ber tatar bayı, Fäyez Ğilmanov “Räşidä” mäçeten tözegän. Östäwenä, üz yortında şäkertlärne yäşätä häm alarğa ay sayın ber meñ sum külämendä stipendiä tüläp tora ikän. Şäkertlär isä, buşlay yäşäp, borçular belmi uqıy alalar.

Bolardan tış, tuğan awılına öç qatlı poliklinika tözetkän, anı cihazlandırğan. Äle mädäniät yortı belän kitapxanägä dä material' yärdäm kürsätep tora ikän. Awıldaşları Fäyez Ğilmanovnı metsenat dip sanıylar.

Aydar Camali

XS
SM
MD
LG