Accessibility links

дүшәмбе, 5 декабрь 2016, Казан вакыты 15:42

Britan parlamentı deputatı üzeneñ Saddamnan neft aluın kire qağa


Saddam xakimiate Berläşkän Millätlärneñ "Azıq-tölek öçen neft" programmasın Könbatış häm Rusiädäge qayber säyäsmännärne üz yağına awdaru maqsatında qullanğan digän ğäyepläwlär haman da tınmıy. Britan parlamentı äğzası George Galloway şul ğäyeplängännär arasında häm bu atnada ul Washingtonğa barıp, amerikan senatınıñ älege mäs''äläne tikşergän maxsus xäyäte qarşında çığış yasadı. Galloway anda Quşma Ştatlarnıñ Ğiraq suğışın, anıñ ğadi xalıqqa cäfalar kiterüen dä tänqitläp çıqtı.

Senat komissiäse üz ğäyepläwlären, Ğiraqnıñ elekke neft industriäse wäkilläre kürsätmälärenä qora, anda Saddam xökümäteneñ neft kwotaların üzen yaqlawçılarğa birüe kürenä dip belderelä. Şular arasında britan parlamentı deputatı, Ğiraq suğışın kisken tänqitläwe belän tanılğan George Galloway da bar. Senat komissiäseneñ xoquqi kiñäşçese Mark Greenblatt sişämbedä, Galloway elekke Ğiraq xakimiatennän millionlağan miçkä neft aluın yaman şeştän intekkän ber yäş qız xäyriäse aşa yäşergän dip belderde. Ul monı elekke vitse-prezident Taha Yäsin Ramadan häm başqa şundıy yuğarı citäkçelärneñ şahadätnamälärenä nigezlänep äytte.

Audio, Mark Greenblatt

"Ramadan, Gallowayğa neftneñ, anıñ Ğiraqqa qarata mönäsäbäte, Ğiraqqa qarşı çikläwlärne beterügä öndäwe öçen birelüen rasladı, elekke xakimiatneñ başqa wäkilläre isä şul neftneñ Gallowayğa "azıq-tölek öçen neft" programması nigezendä birelüen äytte" di Mark Greenblatt. Senator Norm Coleman citäklägän şuşı komissiä britan deputatın şulay uq, neft satudan kilgän 300 meñnän artıq dollarnıñ kire Saddam xökümätenä küçerüdä dä ğäyepläp çıqtı. Ämma Galloway üze bar şuşı ğäyepläwlärne dä kire qaqtı. Monıñ öçen maxsus Washingtonğa kilep ul senat wäkillärenä, bu safsata dip belderde:

Audio, George Galloway

"Min neft satuçı tügel häm berqayçan bulmadım da. Minem ber genä miçkä dä neft satqanım da, alğanım da, kürgänem dä yuq. Monı minem isemnän eşläwçe dä bulmadı" di britan deputatı Galloway. Elek premyer-ministr Tony Blairnıñ Xezmät partiäsendä torğan, läkin anıñ belän Ğiraq mäs''äläsendä kileşä almağannan soñ annan kitep üz Xörmät partiäsen qorğan Galloway, amerikan senatınıñ kinät kenä "azıq öçen neft" programmasın tikşerä başlawı, cämäğätçelek iğtibarın Quşma Ştatlarnıñ Ğiraqtağı uñışsızlığı wä xatalarınnan başqa närsägä yünältü tırışlığı bulıp tora dip belderä.

Audio, George Galloway

"Ägär dä dönya, xäzer sez urınınnan alunı taläp itkän Kofi Annannı tıñlağan bulsa, ägär dä dönya, xäzer sez satlıq dip sürätlägän prezident Jacques Chirac süzlärenä qolaq salsa, ägär dä dönya mine häm Britaniädäge suğışqa qarşı xäräkätne tıñlağan bulsa, bez bügenge tösle hälakätkä tap bulmağan bulır idek. Senator, menä qayda ul töten çığaru" dip ğäyepli amerikan yağın George Galloway. Senat komissiäse Saddam Xösäyen xakimiatennän neft kwotaların aluda Fransiäneñ elekke eçke eşlär ministrı Charles Pasquanı häm Rusiäneñ liberal-demokratları citäkçese Vladimir Jirinovskine dä ğäyeplägän ide. Alarnıñ ikese dä monı kire qaqtı. Tikşerüçelärneñ berse Steven Groves, Rusiä yağında Ğiraq neften aluçılar arasında tışqı eşlär ministrlığın, "Yedintstvo" partiäsen häm elek prezident idaräsen citäklägän Aleksandr Voloşinne kürep bula dip tä beldergän ide.

Kärim Kamal
XS
SM
MD
LG