Accessibility links

якшәмбе, 4 декабрь 2016, Казан вакыты 13:18

Üzbäk ğäskärläre Qarasunı kontrol'gä aldı


Üzbäk ğäskärläre kürşe Qırğızstan belän çik buyındağı häm ikegä bülengän Karasu şähärenä bügen kire äylänep qayttı. Uzğan atnada çualışlar başlanğan xärbilär 20 meñ keşelek bu şähärdän kitkän ide. Soñğı berniçä kön buyı şähär protest belderüçelär qulında buldı. Uzğan comğa könne yaqındağı Ändican şähärendä bulğan köç qullanudan qaçuçı küp kenä qaçaqlar Karasuğa sıyındı. Qayberläre Qırğızstanğa ütä aldı. Şähär xalqı äytüençä, bügenge operatsiädä 200dän alıp ber meñgä qädär xärbi qatnaşqan. Qorallı bäreleşlär bulmağan. Şahitlär äytüençä, berniçä keşe, şul isäptän protest çaraların citäkläwçe dip şiklänelgän Bäxtiär Räximov qulğa alınğan. Kiçä jurnalistlarğa Räximov Üzbäkstanda İslam xökümäte urnaştırırğa yardäm itäçägen beldergän ide. Bügen Azatlıq xäbärçese Gafur Yuldaşev Karasunıñ üzbäk yağınnan bolarnı xäbär itte. AUDİO: Şähär maşinalarğa utırğan soldatlar qulında. Tirä yündä boralaqlar oça. Qırğızstanğa çığuçı küpergä kilgändä, andağı çik saqçıları 14-nçe mayda xalıq çualışlarları waqıtında annan qaçıp kitte. Bügen şähärgä armiä kergäç çik saqçıları kire urınnarına qayttı. Alarnıñ kübese qorallanğan. Qara xärbi kiem kigän keşelär dä bar, küräseñ eçke eşlär ministrlığı xezmätkärläre. Alar qullarına aftomat qorallar totqan häm ut açarğa äzer tora.

Quşma Ştatlar belän Britaniä Üzbäk iminlek köçläre Ändican şähärendä yözlärçä protest belderüçene ütergän digän xäbärne bäysez räweştä tikşerergä çaqırdı. Xakimiätlär bäreleşlärdä ber yözdän artıq keşe ülde disä, şahitlär häm qayber xäbär agentlıqları ülüçelär sanı 500-dän arta dip belderä.

XS
SM
MD
LG