Accessibility links

пәнҗешәмбе, 8 декабрь 2016, Казан вакыты 03:15

Başqortstanda prezident Räximovnıñ yıllıq yullamasın tikşerälär


Başqortstanda kiçäle-bügenle iñ küp söylängän tema - prezident Mortaza Räximovnıñ respublik xalqına häm Başqortstan parlamentına yıllıq yullaması belän çığış yasawı. Räximov äfände bu çığışın atnaqiç könne Başqortstan Däwlät Cıyılışı-Qorıltayda yañğırattı. Respublikanıñ räsmi mäğlümat çaraları, härwaqıttağıça, törle keşelär belän äñgämälär oyıştırıp, prezidentnıñ yullamasına fikerlären beleşä başladı. Aldan uq kötelgänçä, xaqimiätlär qulındağı radio häm televidenie kanalları, gäzitlär, Mortaza Räximovnıñ yıllıq yullamasına yuğarı bäyä birä, anıñ törle ölkälärgä qarağan öleşlären üterep maqtıy. Şul uq waqıtta bäysez säyäsät belgeçläre Mortaza Räximovnıñ süzlärendä bernindi dä yañalıq yuq, anda ğomum töşençälär, matur süzlär genä, dip belderä. Mortaza Räximovnıñ çığışı «Başqortstan strategiäse – xalıq faydasına xezmät itü» dip atala. Ber qarağanda, bu isem üze ük küpne wäğdä itä kebek. Ämma Başqortstandağı tanılğan ğälim, iqtisad fännäre doktorı Rinat Ğatawllin süzlärençä, çığışnıñ eçtälegendä xalıq faydasına real alğa kiteş turında täğayın süzlär bik az. Byüdjet ölkäsendä eşläwçelärgä federal xökümät xezmät xaqın 1,5 tapqırğa arttıru xaqında qarar çığarsa da, bu xaqta Başqortstan prezidentı läm-mim. Rinat äfände şulay uq Başqortstanda balalar öçen birelüçe posobielär külämen arttıru turında da prezident yullamasında ber süz dä äytelmäwenä igtibar yünältä. «Rusiäneñ qayber töbäklärendä balalarğa ay sayın tülänüçe posobielär 400-600 sumğa qadär barıp citä, ä Başqortstanda anıñ küläme nibarı 80 sum ğına, – di Rinat Ğatawllin. – Bu aqça balanı ber kön aşatırğa da citmi bit. Şuña da qaramastan, Mortaza Räximovnıñ yıllıq yullamasında balalar posobielären arttıru xaqında ber süz dä äytelmägän». Şulay da iqtisad belgeçe bularaq, Rinat Ğatawllin prezidentnıñ çığışında uñay fikerlär buluın da kire qaqmıy. Misal öçen, respublika yağulıq-energetika tarmağı şirkätläreneñ yañadan däwlät qaramağına qaytarıluın uñay bäyäli ul. Başqortstan yağulıq-energetika tarmağı şirkätläreneñ kire däwlät qaramağına qaytarıluın uñay bäyäläp, şul uq waqıtta Rinat äfände neft häm energetiqä şirkätläre tabışlarınıñ näq menä xalıq mänfäğätenä yünäldereläçägenä genä beraz şik-şöbhälären belderä. «Ägär neft belän elektr energiäsennän alınğan keremnär cämğiättä döres bülensä, Başqortstandağı küp kenä sotsiäl mäsälälärne uñışlıraq xäl itep bulır ide», – di Rinat Ğatawllin.

XS
SM
MD
LG