Accessibility links

сишәмбе, 6 декабрь 2016, Казан вакыты 15:19

Başqortstan Tatar ictimaği üzägenä qarata mäxkämä eşe tuqtatılırmı?


Elegräk tä xäbär itelüençä, Rusiä Yüstitsiä ministrlığınıñ Başqortstan buyınça Baş idaräse bu yılnıñ aprel ayı azağında Başqortstan Tatar ictimaği üzägenä qarata mäxkämä eşe açunı sorap, Ufanıñ Kirov rayonı mäxkämäsenä möräcägät itkän ide. Mäxkämä aşa Tatar ictimaği üzägen yabu küzallandı bu oçraqta. Moña etärgeç itep törle säbäplär kiterelde. İmeş, Tatar ictimaği üzäge üzeneñ eşçänlege xaqında xisap tapşırmağan ikän, yänäse, ul, ğomumän dä, räsmi terkälmiçä eşli ikän häm başqa häm başqa säbäplär. BR Tatar ictimaği üzäge eşçänlegenä bäyä birü buyınça mäxkämäneñ täwge utırışı un kön çaması elek bulğan ide. Anda bernindi dä qarar qabul itelmäde häm çirattağı utırış 19 mayğa bilgelände. Ämma bu könne Kirov rayonı mäxkämäse älege eş buyınça utırışın ütkärmäde. Monıñ säbäbe bik ğadi. Baqsañ, Rusiä Yüstitsiä ministrlığınıñ Başqortstan buyınça Baş idaräse Başqortstan tatar ictimaği üzäge eşçänlegenä qarata bulğan däğwaların «yañadan östämä tikşerü öçen» digän añlatma belän, Kirov rayonı mäxkämäsennän kire alğan ikän. Monı bezgä BR Tatar ictimaği üzäge räise Ayrat Ğiniätullin xäbär itte. Anıñ süzlärençä, Yüstitsiä ministrlığı Baş idaräseneñ Tatar ictimaği üzägenä bulğan däğwalarınıñ nigezsez buluı aldan uq bilgele ide. Şuña kürä dä xoquq belgeçläre üzläreneñ bik aqıllı adım yasamağanlığın añlap, üzläre ük xataların tözätergä bulğandır. Şulay da Ayrat äfände äle Tatar ictimaği üzägenä qarata uydırma ğäyeplär häm däğwalarnıñ kiläçäktä dä tuqtalmayaçağın äytä. Bäylänü öçen säbäpne tabıp bula inde ul, di Ayrat Ğiniätullin. Äle Başqortstan Tatar ictimaği üzäge üzeneñ çirattağı qorıltayına äzerlänä. Ul bu yılnıñ 22 iyünenä bilgelände.

XS
SM
MD
LG