Accessibility links

дүшәмбе, 5 декабрь 2016, Казан вакыты 19:50

Dürtöyledäge «Tañ» şirkätendä tañnar haman da küñelsez ata


Başqortstannıñ Dürtöyle rayonındağı «Tañ» dip atalğan xosusıy şirkät tiräsendäge ğawğalı xällär haman da bulsa däwam itä. Elegräk tä xäbär itelüençä, cämğıse 120 keşelek bu kollektivnıñ berniçä eşçese, rayon xaqimiätläreneñ bu şirkätneñ eşenä ayaq çalularına qarşılıq yözennän, iyün urtasında açlıq iğlan itep tä alğan ide. Piketlar da oyıştırdı «Tañ» xezmätkärläre. Älege şirkätneñ rayon xaqimiätläre belän tartqalaşuları xaqında soñğı aylarda qayber bäysez mäğlümat çaralarında xäbärlär kürengälägän ide. Ämma anda xälneñ açlıq iğlan itügä barıp citärlek citdi bulaçağın berkem dä uylamağandır da. Ni säbäple kilep çıqqan soñ älege ğawğa? Ni öçen rayon xaqime Rawil Däwlätov uñışlı eşläp kilgän bu şirkätkä qanığa ikän? Qayber xäbärlärgä kürä, awıl xucalığı produksiäse eşkärtüçe häm säwdä belän şöğellänüçe, yäşlärgä yal itü urınnarı buldıruçı bu kompleksta bügenge köndä eş öçen barlıq şartlar buldırılğan. Şirkät moñarçı barlıq salımnarnı häm başqa çığımnarnı däwlät qaznasına üz waqıtında küçerä barğan. «Tañ» direktorı Rinat Säxibzadin rayon xaqimiätläreneñ yuq cirdän şuşı uñışlı eşlägän kollektivqa qanığuın şäxsi säbäplärdän dip bäyäli. «Şirkät yanındağı ber gektarğa yaqın cirne rayon türäläre, ayırım alğanda xaqimiät başlığı Rawil Däwlätov tartıp alırğa küptän inde xıyallana ide, – di R. Säxibzadin. – Ğädellek öçen küpme mäxkämälärdä ciñsäk tä, haman da bezgä eşlärgä irek birmilär. Soñğı tapqır arbitraj mäxkämädä ciñgännän soñ bezneñ binalarğa elektrnı totaştırırğa tieşlär ide. Ämma rayon xaqimiätläre mäxkämä qararın sanğa suqmıy. Şuña da bezneñ kolbasa citeşterü sexı da, peqarnya da älegä eşli almıy, eşçelär üz ixtıyarınnan tış eşsez torırğa mäcbür». Dürtöyle rayonındağı bu ğawğanıñ başqa säbäpläre dä bar dilär. Rinat Säxibzadin Başqortstanda bıltır prezident saylawları çorında Ralif Safinğa ruxi teläktäşlek kürsätkän bulğan ikän. İmeş şuña da rayon türäläreneñ saruı nıq qına qaynağan. Älbättä, rayon xaqime R. Däwlätov üze monıñ şulay buluın kire qağa. Soñğı ber – ike yılda bu rayonda törle cäncallar, ğawğalar, törle ğädelsezleklär turında iskitmäle xäbärlär gel genä bulıp tora. Räsmi matbuğatta alar xaqında läm – mim bulsa da, xalıq awızın yabıp bulmıy. Häm rayondağı ğädelsezleklär, xaqimiätlärneñ başbaştaqlığı xaqında mäğlümatlar barıber irekle matbuğat bitlärendä çığıp tora. Rayonda barlıq idarä itüneñ xalıqnı fäqät qurqıtuğa ğına qorılğan buluı xaqında da süzlär buş cirdän çıqmıydır. Ämma respublika xaqimiätläre ni öçender Dürtöyledäge xällärgä hiç kenä dä iğtibar itmi.

Fänis Fätxi, Ufa

XS
SM
MD
LG