Accessibility links

Qazanda Batırşa kütäreleşen iskä alırğa äzerlänälär


Tatarstanda bik matur, cılı, xätta qızu könnär tora. Şähär xalqın älege esselektän integep, yallarda tabiğätkä çığıp kitärgä ömetlänep yäşäsä, awıl xalqı isä waqıtnı äräm itmiçä tizräk yazğı qır eşlären tämamlarğa aşığa. Tatarstannıñ awıl xucalığı ministrlığı mäğlümätlärenä qarağanda, respublikada bäräñge inde 84 protsent mäydanda utırtılğan. Bu eştä berençelekne Arça awıl xucalığı xezmätkärläre tota ikän. Ğomumän alğanda, Tatarstanda yazğı çäçü eşläre inde 94 protsentqa tämamlanğan, barısı 2 millionğa yaqın çäçü cirlärendä eş betkän. Şuşı 2-3 köndä respublikanıñ bar rayonnarı da qır eşlären tämamlarğa cıyına. Läkin yañalıqlar, qızıqlı çaralar awıl xucalığında ğına tügel, başqa ölkälärdä dä şaqtıy. Mäsälän, Qazanda bu könnärdä İntel texnologiäläreneñ atnalığı uza. Anıñ qısalarında mäğäriftä, eşmäkärlektä, fänni eşçänlektä qullanıla torğan zamança informatsion texnologiälär belän tanışıp bula. 20 mayda Qazanda meditsina ölkäsendäge yaña texnologiälärgä bağışlanğan fänni-ğämäli konferensiä tämamlandı. Şul uq könne xoquq saqlaw organnarı wäkilläre häm keşe xoquqların yaqlawçılar bergäläşep rasizm, etnik häm dini ızğışlarnı buldırmaw yulları xaqında kiñäşläşte.

2005 yılda Batırşa (Ğabdulla Ğäliev) citäkçelegendäge xalıq kütäreleşenä 250 yıl tula. Şuşı uñaydan Qazanda ğına tügel, Rusiäneñ başqa töbäklärendä dä törle çaralar ütkärü qaralğan, dip xäbär itte azatlıq radiosına Räşit Yağfarov. Qazanda älege çaralar inde 18 mayda uq başlanıp kitkän. Bu könne Märcäni isemendäge Tarix institutında fänni konferensiä ütkän. 25 mayda isä bötentatar Mäğärif berlege häm tatar milli cämäğät oyışmalarınıñ Milli Şurası Batırşa – şäxes häm obraz digän temağa Xalıqlar duslığı yortında uquçılar konferensiäsen uzdırırğa niätli. Çarada Batırşa kütäreleşenä bağışlanğan äsärlär avtorları, ğalimnär, sänğätkärlär, milli xäräkät wäkilläre qatnaşır, dip kötelä. Bu xaqta konferensiäne oyıştıru komitetı räise Räşit Yağfarov söyläde. 20 may könne isä Bötendönya tatar kongressında ber qızıqlı matbuğat oçraşuı uzdı. Ul küptän tügel genä Qazanda dönya kürgän ber basmağa bağışlandı. Tarix fännäre doktorı Damir İsxaqovnıñ 2002 yıldağı xalıq sanın isäpkä alunıñ Başqortstan respublikasındağı näticälärenä bağışlanğan kitabın etnologik monitoring üzäge bastırğan. Tatar kongressında uzğan matbuğat oçraşuda anıñ avtorı, ğalimnär, kongress wäkilläre qatnaştı.

Comğa könne Parijnıñ Gektor Berlioz isemendäge konservatoriäsendä Qazannıñ meñyıllığına bağışlanğan konsert uzaçaq. Anda Bach, Schubert, Liszt häm başqa klassik kompozitorlarnıñ äsärlären fransuz häm tatarstan sänğätkärläre başqaraçaq. Alar arasında Musa Cälil opera häm balet teatrı solistı Zilä Sönğätullina da çığış yasayaçaq. 23 maydan alıp 29na qädär isä Avstriädä respublikanıñ däwlät fol’klor ansambleneñ gastrol’läre uzaçaq. Xäyer, mondıy zur mädäni çaralar Tatarstannan tış qına tügel, üzebezdä dä ütep tora. 21 mayda Layış rayonınıñ Rus Nikol’skoe awılında fol’klor festivale uzaçaq. Älege çarada 40tan artıq çığış yasawçı qatnaşaçaq. Alar arasında respublikanıñ törle rayonnarınnan kilgän wäkillär genä tügel, ä Mari, Çuaş, Udmurt respublikalarınnan, Kirov ölkäsennän dä kilüçelär bula, dip xäbär itä Mädäniät ministrlığı.

Gölnaz İlgizär

XS
SM
MD
LG