Accessibility links

якшәмбе, 4 декабрь 2016, Казан вакыты 15:25

Qazanda III Tatnet forumı ütte


İnternetnıñ tatar öleşendä eşläwçe, andağı söyläşülärdä qatnaşuçı, anda qulla alırlıq programmalar eşläwçe keşelär, bu atnada (18 mayda) forumğa cıyıldı. Ul Tatarstannıñ matbuğat könenä bağışlanğan çaralar qısalarında ütkärelde. Forumnıñ berençe öleşendä, entuziast «tatnet»çılardan tış, räsmi keşelär dä qatnaştı. Alar internet üseşen däwlät säyäsäteneñ ber öleşe itep küz allarğa çaqırdı. Mäsälän, elemtä häm informatizatsiä ministrı Färit Fazılcanov, respublikada bu ölkädä eşlänä torğan eşlär xaqında söyläde. Möhim eşlärneñ berse itep, «Microsoft» şirkäte belän alıp barıla torğan proyektnı, «Windows»nı tatarçalaştıru kebek eşne telgä aldı. İkençe zur eş itep ul, mäktäplärne internetqa totaştıru eşen atadı. Yäşlärneñ zamança texnologiälärgä yaqınlığı, bik möhim närsä dide ministr Färit Fazılcanov. Yaña buyın tatar balaları zamança şartlarda eşlärgä öyränsä, Tatnet ta üsep kitär ide, digän ömettä tora forumçılar. Häm bu ömet küpmeder däräcädä aqlana da başladı. Tatnet forumında informatika uqıtuçısı Rail Ğataullin qatnaşıp, üzeneñ internet aşa uqıta torğan uquçısı, Norma mäktäben tämamlawçı malaynıñ uñışları turında söyläde. Ul, Baltaç rayonında yäşi, rayonda ütkärelä torğan olimpidalar xaqında sayt yasağan. Yegetneñ iseme - Almaz Fäyzraxmanov. Saytı - www.abaga2000.narod.ru. «Abağa çäçäge» digän yarışta, fän-texnika häm tögäl fännärdän mäktäp uquçıları köç sınışa ikän. Olimpiada biremnäre dä şuşı säxifädä birelä. Ciñüçelär isemnäre, nindi awılda, nindi köçle uquçılar yäşi, bolar xaqında da mäğlümat tuplanğan älege säxifädä. Adresı - www.abaga2000.narod.ru.

www.tatar.ru saytı wäkile Azat äfände Äxtariev, internetqa tatar ädäbiätennän xristomatiä cıyıntığın, klassik yazuçılarnıñ äsärlären kertergä täqdim itte. Bu täqdim forumda qatnaşuçılar arasında teläktäşlek taptı. Ämma, käğäzdäge kitaplarnı elektron dokument räweşenä kiterü şaqtıy awır buluı açıqlandı. Şuña forumçılar, kitaplar çığara torğan näşriät belän bu ölkädä xezmättäşlek urnaştıru mömkin, digän fikergä kildelär. Oçraşuda bulğan «Miras» jurnalı wäkile, bu basmada dönya kürgän äsärlärne global çeltärgä urnaştıru niçek mömkin bulır ikän, dip möräcäğät itte. Aña «Tatmedia» ağentlığı wäkilläre bu eştä yärdäm kürsätergä wäğdä ittelär. Mäskäwdän kilgän yäş belgeç Timur Kaşaev, forumda qatnaşuçılarğa, üzeneñ proyektın täqdim itte. Ul elektron süzlek yasıy başlağan häm bu eşne tämamlaw öçen, aña tatar tele belğeçläreneñ yärdäme kiräk ikän. Timur äfände, üzeneñ proyektın, internet aşa qullana torğan, buşlay elektron süzlek itep küz aldında kiterä.

Forumda, äytelgän täqdimnärne tuplap, rezolyutsiä proyektın qabul ittelär. Anda mäsälän, tatar internet cämäğätçelege xökümättän Tatarstannıñ üz domenın buldırırğa sorıy, «Tatnet» yoldızlarına teläktäşlek kürsätü, belem birü mäydançığın buldırunı xuplaw, Timur Kaşaev yasağan elektron süzlek proyektın uñışlı dip tabu häm başqa matdälär urın aldı.

Bikä Timerova.

XS
SM
MD
LG