Düşämbedä Tatarstan premyerı Röstäm Miñlexanov Qol Şärif häm Blagoveşçenie çirkäwen açu tantanalarına bağışlanğan çaralarğa äzerlänü buyınça oyıştıru komitetınıñ utırışın uzdırdı.
Tatarstan xökümäte qarşında älege ğıybädätxänälärne açu tantanaların oyıştıru buyınça maxsus törkem dä eşli. İnde xäbär itelgänçä, Qol Şärif mäçeten açu bıyılnıñ 24 iyünenä bilgelängän. Ä Blagoveşçenie saborı isä 21 iyüldä üz işeklären açaçaq. Älege prawaslaw çirkäwen açuğa Rusiä prawaslawları başlığı Aleksiy ikençe ataqay da kileçäk. Mäğlümat agentlıqları xäbär itkänçä, Aleksiy ataqay, çirkäw açıp qına qalmıy, ä Qazan prawaslaw yeparxiäse tözelgängä 450 yıl tulu tantanalarında da qatnaşaçaq. Ataqaynıñ, agentlıqlar kitergän süzlärenä qarağanda, ul näq menä şuşı ike waqiğa tantanalarına kilä. Ä meñ yıllıq Qazan digen süzlärne ataqay telgä almıy. Xäyer, monısı anıñ şäxsi eşe.
İnde, düşämbedäge tantanalarnı oyıştıru buyınça komitet utırışına kilgändä, anıñ eşendä vitse-premyer Zilä Wälieva, Qazan merı Kamil İsxakov, Tatarstan möftie urınbasarı Wäliulla Yaqub häm Qazan häm Tatarstan ärxäräye Anastasiy ataqay qatnaştı.
Älege utırışta qatnaşuçılar, Qol Şärif mäçete xaqında kübräk süz alıp bardılar. Çönki ul, çirkäwgä qarağanda ber ayğa aldanraq açıla. Şulay bulğaç, waqıt könnän-kön azaya bara. Qol Şärif mäçeten respublika xakimiäte Tatarstannıñ töp, märkäz mäçete itep küzallıy.
Bu tantanalar niçek ütäçäk soñ? Çarada, barlığı 5 meñgä yaqın keşe qatnaşır dip kötelä. Şul isäptän, däräcäle qunaqlar da. Ul, däräcäle qunaqlarğa inde prezident Şäymiev isemennän çaqırular cibärelgän. Alar arasında İslam konferensiäse oyışmasınıñ general sekretları Äkmaleddin İxsanoğlu, Törkiä respublikasınıñ din eşläre ministrı Ali Bardaqoğlu, Kuwäyt däwläteneñ waqıf häm islam eşläre ministrı Abdulla Maatuq, Rusiä möftilär şurası räise Rawil Ğäynetdin, Ufadağı Diniä näzaräte räise Tälğät Tacetdin, möselman illäreneñ Rusiädäge 17 ilçese, BDB illäreneñ häm RF töbäkläreneñ möftiläre bar. Şulay uq, 1000 nän artıq Tatarstan imamı da qatnaşaçaq.
Qazan merı Kamil İsxakov, komitet utırışında, Qazanda 1803 yılda näşer itelgän berençe basma Qor’änneñ yaña nösxäläre här VIР, yäğni däräcäle qunaqqa tapşırılaçaq dip belderde. Läkin, mer äfände, Qol Şärif mäçete qarşında inde niçä yıllar eşläp kilgän “Раки” sıraxanäse turında süz quzğatmadı. Kreml' mäydanında berdänber sıra satıla torğan bu urınnı, Kamil İsxakovtan, ul cirdän aldıruın küp märtäbälär cämäğätçelek taläp itkän ide. Küräseñ, Qazan xakimiätenä Tatarstannıñ märkäz mäçete häm pivnuşqalarnıñ kürşedäş buluı oşap toradır.
Räfis Cämdixan
