Accessibility links

дүшәмбе, 5 декабрь 2016, Казан вакыты 05:40

Tatarstanda ruslarnıñ Karavon bäyräme uzdı


Qayda niçek, ä Tatarstanda cäy citte. Bu yallarda häm düşämbe könne köndez esselek 28 däräcägä citte. Basularda tuzan kütärelä, çäçüleklärneñ 97 protsentı inde eşkärtelgän. Soñğı yallarnıñ iñ zur ictimaği waqiğası bulıp Layış rayonında ütkärelgän Karavon bäyräme sanalırğa xaqlı.

Karavon ul – äylän-bäylän digän süz, urıslarnıñ İzge Nikola könnärendä küñel açuları. Menä inde 13 tapqır Tatarstanda, äytergä kiräk Rusiädä barı tik monda ğına, şundıy zur däräcädä rus fol'klor bäyräme ütkärelde. Milli kiemnär kigän meñnärçä keşe urıs keşese häm alarnı qararğa kilgän başqa millät wäkilläre Russkoe Nikol'skoe awılınıñ tuğayında çın xalıq icatı ürnäklären başqaralar. Bıyılğı Karavonğa 47 rus fol'klor ansambl’läre kilgän. Şul isäptän, Rusiäneñ törle ölkälärennän, Tatarstannıñ rayon häm qalalarınnan talantlı üzeşçän artistlar. Boları äle gala-konsert programmasına kerä alğan törkemnär. Şunıñ östäwenä, tuğaylarda, alannarda cırlap, biüçe keşelär tağın da kübräk ide.

Ägär dä Vladimir Putin Tatarstanda urıslar niçek yäşi, digän sorawğa cawapnı şuşı könnärdä respublikağa üze kilep ezläsä, şaqqatqan bulır ide. Böten ilgä bu täcribäne taratırğa färman çığarır ide ul. Kem belä, bälki berär tapqır kilep tä çığar. Bıyıl Karavonğa Rusiäneñ Mädäniät ministrı Sokolov, Tatarstan prezidentı, premyer-ministrı häm başqa räsmi zatlar çaqırılğan ide. Karavon uñayınnan Mintimer Şäymievnıñ täbrik süzlären prezident Apparatınıñ ör-yaña citäkçese Yuriy Kamaletdinov alıp kilgän ide. Şuña östäp, ul biredäge fol'klor törkemenä Gazel' maşinasın tapşırdı.

Rimzil Wäli

XS
SM
MD
LG