Accessibility links

җомга, 9 декабрь 2016, Казан вакыты 06:54

New York tatarları üzlären tanıta


Tatarstanda qır eşläre häm yallar teması aktual bulğanda, Amerikadağı millättäşlärebez, üzlären cirle xalıqqa tanıtu çarasın ütkärde. Ber niçä yıl rättän, New York şähärendä «Töreklär paradı» ütkärelep kilä. Töreklär yanında, soñınnan başqa törki xalıqlar da quşıla. Şul isäptän, tatarlar da. Bıyıl berençe tapqır, Amerikada uquçı tatar yäşläre şuşı paradta qatnaşıp, üzlären amerika xalqı aldında kürsätergä tırıştı. Paradqa ber niçä atna qala, Amerikadağı tatar yäşläreneñ internet säxifäsendä, canlı söyläşülär başlandı. Törki-xalıqlar belän bergä barabızmı, östebezgä milli kiemnärne qaydan alabız, nindi şiğarlär kütäräbez dip söyläşte alar. Qazanda tanışları bulğannar, Tatarstannan keçkenä bayraqlar, gerblarnı kitertüne soradılar, başqaları, üz qızları belän qalfaqlar tekte häm kiemnärenä milli bizäklär töşerde. «İdel-Ural tatarları», digän taqta, Qazannıñ zuraytılğan räsemnären dä yäşlär üz aqçaların yasatqan. İnde parad köne kilep citkän. New Yorkta häm yaqındağı şähärlärdä yäşäwçe yäşlär parad bulası urınğa cıyılğan. Bez, şuşı paradta qatnaşqan yäşlär belän, alar uramnan barğan mizgellärdä, mobil telefon aşa elemtägä çıqtıq. El’vira Xälil belän söyläşäbez.



«Kön bik yaxşı, qoyaşlı. 20 gä yaqın tatar yäşläre cıyıldı. Ölkän buyınnan, barı 2 gene keşe bar. Milli kiemnärne kiyep çıqtıq. Bayraqlar kütärep. Ber 10 uram üttek. Manhettanğa kilep cittek.»

Şul arada söyläşüebezgä Marat häm Dilärä Hafizovlar da quşıldı. Marat:

«Monda törki xalıqlar cıyıldı, töreklär, azerbaycannar, qırım tatarları, keşe küp cıyıldı. Bez qırım tatarları artınnan barabız. Üzebezne İdel-Ural tatarları itep tanıtabız.» Dilärä: « Manhettanda barabız. Çat sayın maşinalar tuqtağan. Alar bayraqlar kütärgän tatarlarnı ütkärälär. Kiemnäregez matur, dip cıyılğan xalıqnı bezne sälämli. Bik küñelle.»

New-Yorknıñ Manhettan digän ataqlı rayonınnan barğanda, Amerikadağı tatar yäşläre turında Elvira Xälil belän söyläşüne däwam itäbez. « Bezneñ keçkenä üpkäbez bez. Tatar kongressınnan yärdäm sorağan idek, Tatarstan bayrağın cibäregez, dip. Bezgä cawap ta birmädelär. Bez üzebez tanışlardan ezläp taptıq. Bu çığunı www.tatar-usa.org.ru saytına kerep yörüçe, aralaşuçı yäşlär oyışma oyıştırdı.»- ,dide New Yorkta yäşäwçe El’vira Xälil. Soñınnan xäbär itkänçä, yäşlär kiläse yılda da, şundıy uq çarada qatnaşırğa uylıy. Nıqlabraq äzerlänep, milli kiemnärdän kienep, Tatarstan bayraqların kütärep, tatar muzıkasın yañğıratıp barırğa cıyına alar. Bu eştä alarğa Tatarstan da yärdäm kürsäter, digän ömet belderde yäşlär. Ä Amerika tatar yäşläre bu törki xalıqları paradınnan soñ, küp tä ütmi yañadan oçraşaçaq. Yaqın könnärdä Saban tuyın ütkärü planlaştırılğan.

Bikä Timerova

XS
SM
MD
LG