Accessibility links

Кайнар хәбәр

Cire üzidärä oyışmalarına kem eşlärgä barır?


Cirle üzidärä turındağı qanun qabul itelgäç, parlament wäkilläreneñ bar söyläşüläre, munisipal saylawlar turında bara. 23 may könne, Spas rayonınıñ Bolğar awılı yanında cirle üzidarä oyışmalarınıñ mäğnäse, eş tärtibe häm saylawlarğa äzerlek mäsäläläre turında kiñäşmä ütte. Anı respublikanıñ «Tatarstan-yaña ğasır» xäräkäte wäkilläre oyıştırdı. Respublika rayonnarında citäkçe urınnarda eşläwçe häm älege kiñäşmädä qatnaşqan keşelär äytkänçä, böten närsä aqçağa qaytıp qala.

Tatarstannıñ här awılında, här rayonında häm şähärlärdä, cirle üz idärä oyışmalarına saylawlar ütkäreläçäk. Cirle üz idäräne, xalıq demokratiäse, dip atıylar, xakimiätne keşelärgä yaqınaytu ısulı, dip äytälär. Ul, xalıqqa üzenä xäl itärgä mömkinlek birä, dip maqtıylar. İnde älege qanunnı tormışqa aşıru waqıtı da kilep citte. Parlament räise Färit Möxämmätşin, üze citäklägän xäräkät äğzäläre belän oçraşqanda, cirle izidäräne inqilab belän tiñläde. Anıñ süzlärençä, cirle üzidarä oyışmalarına saylawlar waqıtı kiçekterelergä mömkin. Xäzer qanunğa şundıy tözetmä äzerlänä. Xalıq wäkillären saylaw könen 25 sentäberdän, 16 oktäberenä küçerergä täqdim itelä. Yaña saylanğan munisipal oyışmalarğa oçraqlı keşelär eläkmäsen öçen, respublika xakimiätläre anda üz keşelären ütkärergä teli. Bu eşkä «Tatarstan-yaña ğasır» xäräkäte cälep itelä. Färit Möxämmätşin saylawlarğa xäräkät äğzäläre arasınnan nämzätlärne çığarırğa çaqırdı, şul isäptän yäşlär dä, xatın-qızlar da bulsın, dide ul. Başqarma xakimiät cirle üzidarä belän genä eşennän tuqtamıy, awıl häm rayonnarda anıñ wäkilläre, Başqarma komitet räweşendä eşliyäçäk. İke törle xakimiätneñ mönäsäbätläre nindi bulır, salımnar cıyılmasa, aqçasız munisipal xakimiät närsä eşli alır? Älegä küp sorawlar cawapsız bulıp qala. Cirle üzidarä reformasınıñ yazmışı häm rayonnarda yäşäwçe xalıqnıñ añlawı turında kiñäşmädä qatnaşuçılar belän söyläştek.

Biek tawdan kilgän tabip, Kamil Zıatdinov, üzidarä – zaman taläbe, dip sanıy. Anıñ näticäse bik küzgä kürenä torğan bulmasa da, ul barıber bulsın, di. Balıq bistäsennän kümäk xucalıq räise Fidail Älmiev, äytkänçä, awılda äle saylawlarğa äzerlek başlanmağan. «Minem öçen kiñäşmäde söyläşülär yañalıq buldı» dip belderde ul. Yuğarı Oslan rayonınan, Rafiq abzıy Äxmätşin isä, cirle üz idäräneñ eşe barıp çığuına şik belderä. Anıñ uylawınça, xalıq aña äle äzer tügel .«Salımnar cıyılsa da, alarnıñ küläme awıldağı eşlärne alıp barırğa citärlek bulmasqa mömkin. Aqçası da bulmağaç, eşe dä cawaplı bulğaç, ul üz idärä oyışmalarına eşlärgä kem barır?», - digän borçu belderde Rafiq abzıy. Teläçedän kilgän yäş keşe, Röstäm Niğmätcanov, cirle üzidarä sistemasın kertü, äkren-äkrenläp kiräk, dip sanıy. Ul, xäzerge buyın, üz cirenä xuca bulırğa öyränä almas, ä menä balalarğa yaña tormışnıñ faydası bulırğa mömkin, di.

Cirle üzidarä oyışmalarına, üz keşelären kertergä, dip milli xäräkät äğzäläre dä, kommunistlar da, başqa säyäsi köçlär dä cıyına. Şuña, «Qazannıñ 1000 yıllığı»n bäyräm itü belän bergä, Tatarstanda kiñ külämle säyäsi köräş kampaniäse dä baraçaq, dip farazlap bula.



Bikä Timerova.

XS
SM
MD
LG