Accessibility links

Кайнар хәбәр

Keşe xoquqları aktivistları Üzbäkstandağı qulğa alularğa borçıla


Keşe xoquqları törkemnäre qanlı räveştä bastırılğan protestlardan soñ Üzbäkstannıñ könçığışındağı qulğa alularğa borçılalar. Alar bu keşe xoquqları aktivistların qısunı-auızlıqlaunı maqsät itep quya dip belderälär.

Ändicandağı qan qoyudan soñ Saidcahon Zaynabitdinov xalıqara informatsiä organnarına daim mäğlümät birep kilgän ide. Cirle keşe xoquqların yaqlau törkemeneñ başlığı Zaynabitdinov köç qullanunı genosid dip atağan häm qorbannar sanı xökümät äjtkän 169-dan küberäk dip beldergän ide. Uzğan Şimbädä ul ezsez yuğaldı. İke könnän soñ ğına ğailäse närsäneñ bulğanın öyränä alğan. Ulı İlhomcan bolay añlata

Audio

"Ätimneñ advokatı Mavluda Axmedova miña bolarnı añlattı. Anı vaqıtlıça qulğa alğannar. Ul ike kön elek Oşta bulğan häm anda qulğa alınğan. Alar miña 24-nçe mayda kilergä quşqannar. Min anıñ qulğa alınu säbäben soradım. Alar ber närsä dä äytmädelär."

Zaynabitdinov qulğa alınğan berdän bere aktivist tügel. Human Rights Watchnıñ xezmätkäre Aleksander Petrov bolay dide

Audio

"Bezgä başqa keşe xoquqları aktivistlarınıñ da qulğa alınğan, qıynalğan buluı turında xäbärlär kilä."

Ul şulay uq Ergulik keşe xoquqların yaqlau oyışmasınıñ ike ağzasınıñ Ändicanda sivil kiemle räsmilär tarafınnan qıynalğan bulun da äytte. Anıñ fikerençä, xakimiätlär aktivistlarnı auızlıqlarğa, endäşmäskä mäcbür itärgä telilär.

Audio

"Üzäbäkstandağı xäzerge şartlarda , bigeräk tä Färgana Üzänendä xakimiätlär ul regionnan xäbärlärneñ taralmauın, bigeräk tä Maynıñ 13-ndä yözärlägän ğäyepsez keşelärneñ üterelüe xaqında xalıqara reaksiäne buldırmasqa tırışalar. Ezärlekläv, qulğa alular, cirle keşe xoquqları aktivistlarınıñ bu xaqta mäğlümät ciyıp alarnı xalıqara forumlarğa, jurnalistlarğa , oyışmalarğa häm çit il dävlätlärenä citkerülären buldırmau maqästendä eşlänä."

Başqa regionnardan da raportlar kilä. Üzbäkstannıñ Bäysez keşe xoquqları Oyışmasınıñ Cizzaktağı bülege başlığı Oktam Pardayev cirle räsmilär , şul sanda şähär prokurorı belän bulğan oçraşu xaqında bolay di

Audio

"Mine kisätep bolay didelär. Ğailäñ turında uyla. Sin äle yäş. Ülsäñ sina ber närsä dä yardäm itmäs. Oppozitsiädäge Erk partiäse dä, aqça da yardäm itä almas."

Namanğanda cirle keşe xoquqları aktivistı Sobitxon Ustaboyev Yäkşämbedä qulğa alınğan. Ul Ändicandağı üterülärgä häm xökümätneñ vaqiğäne bäysez tikşerügä yul quymauına protets belderep açlıq iğlan itäçägen beldergännän soñ qulğa alındı. Şähärdäge başqa aktivist Olimcon Yunusov bolay di

Audio

"Üzbäk xökümäte ekonomik reformalar ütkäräse urınğa yañadan xalıqnı ezärlekli, endäştermäs öçen keşelärne qulğa ala. Bez endäşmäsäk ezärlkeläv artaçaq qına."

Human Rights Watch Zaynabitdinonıñ iminlegenä borçıluın belderde häm anı irekkä çığarırğa çaqırdı. Ul şulay uq xalıqara cämağätçelek Üzbäk xökümäten anıñ häm başqa aktivistlanıñ imilegen tämin itärgä çaqırırğa tieş dip tä belderde.

Färit İdelle, Praga.
XS
SM
MD
LG