Accessibility links

шимбә, 10 декабрь 2016, Казан вакыты 09:58

27 May Peterburda Tatarstan prezidentın kötälär


27 mayda Peterburgnıñ tuğan könendä Tatarstan respublikası prezidentı Mintimer Şäymievneñ ber könlek räsmi säfäre kötelä. Ul Qazannıñ 1000 häm Ciñüneñ 60 yıllığına bağışlanğan. Bu uñaydan Tatarstannıñ Peterburgtağı daimi wäkile Şamil Äxmätşin milli-mädäni möxtäriät räise Nail Kikiçev häm Bötendönya tatar kongressı başqarma komitetı äğzası Şamil Aqbulatov belän berlektä matbuğat oçraşuı ütkärdelär. Şamil Äxmätşin jurnalistlarnı säfärneñ maqsatı belän tanıştırdı:

Audio

Tantana waqıtında Peterburg gubernatorı Valentina Matvienkoğa häm Piskarevka memorialına “Alar siña yärdämgä kilde, Leningrad! ” digän kitap tapşırılaçaq. Kitapqa Leningradnı doşmannan saqlağanda hälaq bulğan 16 meñ Tatarstan yawgireneñ iseme kergän. Qorbannarnı iskä alu çarasınnan soñ Mintimer Şäymiev Petropavlovkanıñ Narışkin bastionında 122 mm-lı tuptan ataçaq. Qazannıñ 1000 yıllığı xörmätenä. Ä gilzasına Piskarevka, “Nevskiy pyataçok” tufrağın salıp, Qazanğa büläk itäçäklär.

Säfär qısalarında gubernator Valentina Matvienko belän oçraşu, ike şähärneñ urtaq problemnar turında fiker alışu da küzdä totıla. Matbuğat oçraşuı waqıtında Şamil Aqbulatov Qazan belän Peterburgnıñ üzara kileşüeneñ ütäleşe turında söyläde. Yegorov isemedäge zavodta Qazan metrosı öçen vagonnar inde äzer ikän. Ä Qazandağı Peterburg uramın tözekländerüdä problemnar bar di, çönki uram astınnan metro liniäse ütä. Metro tözelep betmiçä uramnı maturlap, annan keçkenä Peterburg yasap bulmıy. Tik, şulay bulsa da, bäyrämgä qädär ölgerergä tieşbez, dip ışandırdı Peteyerburgnıñ ataqlı tözüçese Şamil Aqbulatov.

1000 yıllıqqa Peterburggtan başqa törle büläklär dä baytaq bulaçaq ikän: Älbert Äsädullin häm Sufiä Yalışevanıñ diskları, maxsus yübiley jurnalı, Räxim Teläşovnıñ Watan suğışında qatnaşqan millättäşlärebez turındağı kitabı, ”İke şähär - ike yazmış” isemle tarixi kitap, mädäni proğramma, blokadniklarğa häykäl. Äytergä kiräk, bu häykäl öçen matdi çığımnıñ şaqtıy öleşen üze dä blokada balası Şamil Aqbulatov üz östenä alğan. İñ ähämiätkä layıq büläk ul Qazanda 24 augustta açılaçaq Ermitaj üzägeder. Kürgäzmälär zalı, lektorie belän. Bu könne “Altın Urda xäzinäläre” digän kürgäzmä eş başlayaçaq. Daimi wäkil Şamil Äxmätşin äytmeşli, xäzer härber Mamadış malayınıñ Ermitaj baylıqları belän yaqınnan tanışırğa mömkinlege bulaçaq. Şulay bulğaç, kem äyter Tatarstan – provinsiä dip.

Milli- mädäni möxtäriät räise Nail Kikiçev ike şähärneñ suğış veterännarı öçen almaş çaralar turında söyläde. Misal öçen, Peterburg sabantuyına Qazan veterännarın qunaqqa kötälär, piterlılarnı 1000 yıllıqqa alıp barırğa cıyınalar.

Küräsez inde, ike şähär arasındağı bäyläneşlär nığıy bara, küp eşlär eşlängän, eşliseläre dä citärlek. Haman bulsa Tuqay häykäle, şağirebez tuqtalğan Qazan uramı, bişençe yortta xäter taqtası quyılmağan. Ütkän comğa kilüendä mädäniät ministrı Zilä Wäliewa Tuqay häykäle öçen urınnı xuplağan, şuşı könnärdä, nihayat, Tuqay üz urının alaçaq ikän.

Gölzadä Kamalova, Sankt-Peterburg

XS
SM
MD
LG