Accessibility links

пәнҗешәмбе, 8 декабрь 2016, Казан вакыты 15:00

Tatarlar - balet yoldızları


Omski Däwlät Muzıkal' teatrı balet sänğäten söyüçelärgä çın mäğnäsendä büläk yasadı–şuşı könnärdä genä Omskida tanılğan balet artistları qatnaşında festival' uzdı. “Balet yoldızları” digän isem astında barğan bu festival' tizdän Mäskäwdä ütkäreläçäk 10-nçı xalıqara balet konkursı aldınnan oyıştırıldı. Atna buyına säxnädä Omski teatrı artistları belän bergä dön'yaküläm tanılğan biüçelär çığış yasadı. Alar arasında Tatarstannıñ xalıq artistları, küp kenä konkurslar lawreatları, törle däräcäle isemnär iäläre Liliä Musovarova häm Aydar Äxmätov buldılar. Festival' barışında ütkän gala – konsertta da, Jizel', Sçelkunçik baletlarında da iñ köçle alqışlarnı älege biüçelär yawladılar.

Äytergä kiräk, zalda bu biüçelärneñ ostalıqlarına soqlanmağan ber genä tamaşaçı da qalmağandır. Belgeçlär fikerençä, Aydar Äxmätov belän Liliä Musovarovanıñ bergä yasağan här çığışı - yuğarı biü sänğäte ölgese. Liliä tamaşaçını härwaqıt üzenä ber törle yomşaq plastikası belän äsir itsä, Aydar artistlığı, yuğarı texnikası belän soqlandıra. Şunsı ayanıç, bu artistlar belän oçraşıp söyläşü mömkinlege bulmadı. Saqlanu maqsatınnan axrı, alar belän sanawlı jurnalistlar ğına sirat küperen kiçep kenä oçraşu bäxetenä ireştelär.

Östäp şunı da äytergä kiräk, dönya külämendä tanılğan bulmasalar da, Omski muzıkal' teatrında tatar millätennän bulğan artistlar yuq tügel. Zöhrä Äxmätşina, Zöhrä Astankova, Yelena Şixova kebek biüçelär, soñğı yıllarda ğına Saratov häm Çiläbe şähärlärendä yuğarı sänğät uqu yortların tämamlap kilgän cırçılar Gölnara Nizamova, Elwira Gıyzzatova, teatrnıñ äydäp baruçı artistları bulıp toralar. Rus mädäniätenä xezmät itsälär dä, alar tatar sänğätennän dä bötenläy çittä qalmıylar. Elwira Gıyzzätova mäsälän, yış qına ölkä milli-mädäni moxtariäte oyıştırğan mädäni çaralarda çığışlar yasıy, törle cır konkurslarında qatnaşa. Ğomumän, Omski tatarlarınıñ ictimaği tormışı belän qızıqsınıp yäşi.

Rozaliä Sayganova, Omski.

XS
SM
MD
LG