Accessibility links

шимбә, 10 декабрь 2016, Казан вакыты 08:08

Qazan mäktäplärendä soñğı qıñğıraw bäyräme ütte


Qazannıñ 26nçe tatar mäktäbendä, ä xäzer inde litseyda, soñğı qıñğıraw bäyräme ütte. Küpçelek Qazan mäktäplärennän ayırmalı bularaq, uqu tämamlanuğa bağışlanğan çara tatar telendä ütkärelde. Uqıtuçılarğa atap yazılğan şiğerlär dä tatarça ide. Mäsälän, matematika uqıtuçısına sinuslar häm kosinuslarnı öyrätkän öçen räxmät äyttelär, ä tarix fänen uqıtqan keşegä «Yawız İvan, Qazannı basıp alğan, uqıtuçı apa, soylä äydä, minem beläsem kilä» digän ruxtağı süzlär äytelde. Mäktäpne tämamlawçı yegetlär, Salawatqa oxşatıp, uqıtuçılarğa atap cırlap aldı.

Bäyräm waqıtında mäktäp tämamlağan yegetlär, qızlar belän söyläşep aldıq. Alarnıñ küpçelege yuğarı uqu yortlarına kerergä teli. Qabul itü imtixannarın qaysıberläre tatarça birä, ikençeläre – urısça, ämma urıs telendä imtixan birü alarğa awırlıq tudırmıy, çönki alar urısça yaxşı belä, ä tatar telen, milli mäktäptä uqımasaq, bötenläy belmäs idek, dide yäşlär. Älege mäktäp, bıyıldan başlap üzeneñ statusın litseyğa üzgärtkän. Qazannıñ Aviatözeleş rayonında tatar telendä uqıta torğan mäktäplär häm gimnaziälär küp bulğanğa kürä, ber mäktäpne tatarça, törekçä häm inglizçä uqıta torğan uqu yortına birergä uylağannar. Monda xäzer 7nçe sıynıftan ğına qabul itä başlıylar. Ämma anda da, qabul itü imtixannarı tatar telendä bulaçaq, dide älege litseynıñ uqıtu eşläre öçen cawaplı direktor urınbasarı Ğaripova El’vira İlyas qızı. Anıñ belän dä, tatar telendä birelä torğan belem sıyfatı häm tatarça uqıtunıñ kiräklege mäsäläle turında söyläştek. Elvira xanım äytkänçä, mäktäp tämamlawçılarnıñ küpçelege, 80% , yuğarı uqu yortlarına kerä ala. «Tatar telendä uqıymı, urıs telendäme, ayırma yuq, barı uquçılarnıñ teläge keräk. », dide ul.

Şul arada, mäktäptäge bäyräm tämamlandı, uquçılar, ta-analar taraldı. Balalarnı qatlawlı çığarılış imtixannarı kötä. Kemder berdäm däwlät imtixanın biräçäk, başqalar iskeçä imtixan tapşıraçaq. Mäktäp işek aldınnan, balalar belän bergä çıqtıq. Bäyrämdä alar tatarça şiğer söyläsä, inde üz ara aralaşqanda urıs telenä küçkännär ide.

Bikä Timerova.

XS
SM
MD
LG