Accessibility links

Кайнар хәбәр

Tatar kongressnıñ İvanovo şähärendä küçmä utırışı uzdı


Pänceşämbe irtäsendä ber törkem cämäğät eşlekleläre, ğalimnär, jurnalistlar İvanova şähärennän Qazanğa qaytıp töştelär. Alar uzğan çärşämbe 25 mayda İvanovada ütkän tatar milli – mädäni çaralarında qatnaştı. Anda tözelgän mäçet yanında mäktäp – mädräsä binasınıñ nigez taşı salu yolası, şulay uq BTK byurosınıñ küçmä utırışı, İvanova universitetında milli tatar mäğärife häm yäkşämbe mäktäbe turında konferensiä, ölkä gubernatorı, şähär başlığı belän oçraşular kebek bik möhim häm qırıq çaralar şul uq çärşämbe kön qısalarına sıya aldı. Qazannan İvanovağa qädär 12 -13 säğät, yäğni tön däwamında säfär qılıp, köndez şuşı çaralarda qatnaşqannan soñ İvanova tatarlarınıñ üzeşçän teatr-spektaklen qarağannan soñ tağın tön däwamında 800 çaqrım yullar ütep Qazanğa qaytu öçen citdi säbäplär bar. İvanovağa baruçılar arasında eş belän mäşğül keşelär – tatar kongressı citäkçese Rinat Zakirov, anıñ urınbasarı, tarix fännäre doktorı – Damir İsxaqov, xökümät apparatınıñ bülek mödire – Kim Miñnullin, mäğärif ministrlığınıñ bülek mödire – Radik Zaripov, yazuçı häm cämäğät eşleklese Fäwziä Bäyrämova, başqarma komitet apparatınıñ cawaplı xezmätkärläre Rinat Wäliullin, Miläwşä Ğömärova, Gölnaz Şäyxieva, şulay uq Penza, Vladimir, Mäskäw, Tübän Novgorod, Ryazan’ ölkäläreneñ tatar cämğiätläreneñ citäkçeläre İvanovağa ber dä yuqqa ğına cıyılmadı. Elekke Vladimir kenäz bilämälärendä, çıqıldap torğan rus häm pravoslav töbäge ivanovada menä inde 10 yıldan artıq tatar milli, dini tormışı canlanıp kilä. Anda bik matur, mähabät mäçet tözelgän, yäkşämbe mäktäe eşli, Sabantuylar ütä, yäşlärneñ Nur cämğiäte häm tatar milli möxtäriäte tözelgän. Anıñ başlap yörüçe häm möfti Färit Lyapin ölkä xakimiät orğannarı belän urtaq tel taba alğan.

Fänni – praktik konferensiädä häm tatar kongressınıñ byuro cıyılışında başqarılğan eşlärgä yomğaqlar yasaldı. Rusiäneñ bik küp töbäklärendä islam dinenä häm milli cämğiätlärgä qırın qaraw ğädätkä kersä, İvanovada tatarlarğa mönäsäbät äybät. Ölkä gubernatorı Vladimir İl'iç belän oçraşu waqıtında ul, bez tatarlarnıñ oyışqanlığın, añ- belem, tärtiplelegen kürep torabız. Bezneñ tatar cämğiäteneñ milli, mädäni, dini üseşenä şatlanabız dip belderde. Yaña tözelgän mäçet, yäğni islam mädäniäte üzäge ixatasında. Mäktäp–mädräsägä nigez taşı salu da şähär başlığı Groşov belän bergä küptän tügel genä ölkä gubernatorınıñ urınbasarı itep bilgelängän Rinat Yağfarov ta qatnaştı. Orenburda tuğan, Çiläbedä üskän, xosusıy biznesta, şulay uq Gazpromda häm Rusiä prezidentınıñ administratsiäsendä eşlägän bu yäş yeget perspektivalı kadr, dip sanala. Şähär Sovetı deputatları citäkçese dä tatar millätennän.

Ğomumän, bu oçraşular İvanova töbägendäge borınğı törki tatar awılları, millättäşlärebezneñ tarixi ezläre turında bik küp närsä mäğlüm buldı. İñ möhime, dokladlarda söylänep torğan tolerantlıqnıñ häm milli sabırlıqnıñ tormışta kiñräk taraluı. Bu könne yañğırağan çığışlar da, “Millätem” teatr-studiäseneñ Musa spektaklen quyuı da bik qızıq buldı. Ämma iñ möhime - citdi mädäni ictimaği mäs'älälär tikşerelüe.

İvanovada ütkän cıyılışlardan Qazan qunaqları üzläre belän yaña tä'sir genä tügel, ä başqarası eşlär isemlege alıp qayttılar. Bigräk tä Tatarstan belän xezmättäşlek, tatar yäşläre häm balaları Qazanğa säyäxätkä tatar möxitendä aralaşıp yäşärgä cibärep qaytaru täqdimnäre aktual' bulıp çıqtı. Bügenge säyäsi häm psixologik torğınlıq, kierenkelek çorında milli ruxnıñ irekle üsep kilüe ğädäti waqiğa tügel.

Rimzil Wäli

XS
SM
MD
LG