Accessibility links

шимбә, 3 декабрь 2016, Казан вакыты 20:37

Deputatlar kiläçäktä parlament binası östenä Rusiä bayrağın da elärgä rizalaştı


26 mayda, Qazanda Däwlät Şurası utırışı buldı. Anda iñ qaynar bäxäslär kiterep çığarğan mäs’älä, ul Tatarstan häm Rusiä bayraqları turındağı prokuror protestı buldı . Anda süz Däwlät Şurası binası östendä, ber tigez däräcädä, Tatarstan häm Rusiä bayraqları torırğa tieşlege turında bardı. Bu xaqta bez ütkän tapşıruda söylägän idek. Xäzerge waqıtta, Tatarstan parlamentı binası östendä respublika bayrağı ğına cilferdi. Deputatlar bu mäsälägä qarata qapma qarşı fikerlär äytte. Aleksandr Ştanin, Rusiä bayrağınıñ elenmäwen, cinayät belän tiñläde. Rusiäneñ däwlät simvolları turındağı qanunnı ütämäğän keşelär cawaplılıqqa tartırılırğa tieş, dide. Marat Ğäliev, prokuror protestı yuridik yaqtan, bik ük döres yazılmağan, dip äytte. Deputat Tufan Miñnullin, andıy mäs’älälärne mäxkämä aşa ğına qararğa täqdim itte. Razil Wäliev, bayraq bezneñ öçen izge närsä, parlament Tatarstannıqı, şuña anıñ östendä Tatarstan bayrağı ğına elenep torırğa tieş, dide. «İşektän kergändä, Tatarstannıqı da, Rusiäneke dä cilferdäp tora, kön sayın bezne qarşı ala, şul citmi meni?»- dide ul. Razil Wäliev, äbi patşa zamanı belän tarixi parallel ütkärde. Ul waqıtta, Qazanda mäçet çirkäwgä qarağanda biegräk bulu qurqınıçı turında donos yazılğan bulğan. Soñınnan Färit Möxämmätşin da mäsälägä üz qaraşın belderde. «Elek elektän şulay kilgän, däwlät oyışmalarınıñ binaları östendä ber genä bayraq tayağı quyılğan, ber kem moña qarşılıq beldermägän. Ämma, min monda prokuror protestında döreslek bar, dip tä sanıym. Bez bit Rusiä eçendä, anıñ belän ber kem bäxäsläşmi xäzer. Bez anı tanıybız, şuña qanunnarnı da, konstitutsiäne dä täñgälläşterdek. Min prokuror protestın kire qaqmıyça, iğtibarğa alırğa, täqdim itär idem», - dide parlament başlığı.

Deputatlar parlament citäkçeseneñ süzen tıñladı. Prokuror protestın iğtibarğa alırğa buldılar. Kiläçäktä, ike bayraqnı da ber yulı elü mäs’äläsen xäl itü yağın qarabız, digän täqdimne, küpçelek tawış belän, qabul ittelär.

Bikä Timerova.

XS
SM
MD
LG