Accessibility links

шимбә, 10 декабрь 2016, Казан вакыты 15:52

Belarus poläkläre Ufa tatarları süzlären qabatlıy - "bügen Belarustä poläk bulu bik awır"


Ä xäzer süz Belarus, döresräge, anıñ könbatış kürşese Pol''şa belän mönäsäbätläre turında. Ser tügel, Warşaw inde küptännän Belarus xakimiateneñ keşe xoquqların häm demokratik prinsiplarnı tupas bozuın tänqitläp kilä. İlneñ tışqı eşlär ministrlığı prezident Aleksandr Lukaşenka xakimiaten iskelek qaldığı dip bäyäli. İke il arasındağı kierenkelek urtasında Belarustäge poläk azçılığı xoquqları häm räsmi Minskineñ ğäyre räsmi oyışmalarğa qarata tiskäre mönäsäbäte tora.

Räsmi Minski wä Warşaw arasında bügenge köndä suğış bara. Döres anı barı tik diplomatik frontta ğına kürergä mömkin. Düşämbe könne Pol''şa Belarusneñ berniçä räsmi wäkilenä, alar arasında yustitsiä ministrı Viktor Halavanov ta bar ide, ilgä kerüne tıydı. Aña qädär prezident Lukaşenka xökümäte Minskidäge ber poläk diplomatın, ul Belarustä yäşäwçe 400 meñläp poläkne xökümätkä qarşı baş kütärügä qotırta dip, ildän quıp çığarğan ide. İke aradağı kierenkelekneñ tamırları Belarus poläkläre berlege - BSPneñ mart ayında Hrodno şähärendä uzğan cıyınında yata. Anda oyışmanıñ citäkçese itep 31 yäşlek Anjalika Barys saylanğan ide. Belarusneñ räsmi xäbär agentlığı Belapan şunda uq anıñ, bez säyäsättän çittä torabız häm xakimiat belän bar ölkädä dä xezmättäşlek itäçäkbez digän süzlären tarattı. Läkin Belarusneñ Yustitsiä ministrlığı BSP cıyının demokratik tügel dip iğlan itte häm anda yaña citäkçelek saylaw qanuni bulmağan dip belderde. Belgeçlär fikerençä, xakimiat Lukaşenka tarafdarı sanalğan Tadeuş Kruçkowskineñ citäkçelektän çitlätelüen telämägän bulğan. Minskidäge İctimaği, iqtisadi wä säyäsi tikşerenülär institutı mödireneñ urınbasarı Vladimir Doroxov, şuşı nizaq Lukaşenkanıñ Belarustäge bar närsäne kontroldä totarğa teläwe belän añlatıla dip isäpli:

Audio, Vladimir Doroxov

"Üzeneñ säyäsi fälsäfäse säbäple, Belarus xakimiate nindider möstäqil ber buyınnıñ üz tä''sirennän başqa eş itüen nigezdä röxsät itä almıy. Şuña da, poläklär berlege üzläre telägän keşene citäkçe itep saylap xakimiat kontrolennän çığu belän, bu şunda uq xakimiattä zur qänäğätsezlek uyattı" di Doroxov. Anıñ süzlärençä, ägär dä poläklär häm alarnı yaqlağan Pol''şa xäzer şuşı mäs''älädä Lukaşenkağa qarşı qatıraq toruın däwam itsä, bu bar Belarus cämğiate öçen faydağa bulaçaq, çönki Lukaşenkanıñ härnärsäne dä ul telägänçä genä eşli almawı kürenäçäk. Älegä qädär prezident, xakimiat kontrolennän tış eşlärgä tırışqan törle ğäyre räsmi oyışmalarnı yabu yulın saylap kilä ide. Vladimir Doroxov süzlärenä qarağanda, soñğı ike yılda 50-dän artıq şundıy oyışma yabılğan bulğan. Belarus poläkläreneñ berlege oçrağında yustitsiä ministrlığı anı yapmıy, şuña da qaramastan, oyışmanıñ matbuğat wäkile Anjey Pisalnik, räsmi Minskineñ berlekkä qarata kürgän çaraların açıqtan-açıq "anti-poläk" dip bäyäli:

Audio, Anjey Pisalnik

"Älegä qädär poläk milli azçılığı xoquqların şul qädär tupas bozu oçrağı bulğan yuq ide. Poläk berlege şul azçılıqnı wäkillek itä häm Belarustäge milli azçılıqlar arasında iñ zur oyışma bulıp tora" di Pisalnik. Ul şulay uq, Belarus poläkläre bügenge köndä bar ildä xakimiat qulındağı mäğlümat çaraları tarafınnan üzlären pıçratu maqsatında alıp barılğan kampaniägä nıq borçıla di, häm, mäğlüm Nurmöxämmät Xisamovnıñ tatar Kongressında Vladimir Putingä äytkän süzlären beraz üzgärtep, "bügen Belarustä poläk bulu bik awır" dip belderä.

Audio, Anjey Pisalnik

Ämma üz xoquqları öçen üzläre genä köräşkän Ufa tatarlarınnan ayırmalı bularaq, Belarus poläkläre Pol''şa yaqlawına ömetlänä häm Warşaw alarnı üzlären genä qaldırmas kebek. Pol''şa oppozitsiäse citäkçelärennän berse Jan Rokita, Lukaşenka qırşawındağı Belaruskä irekle mäğlümat citkerü öçen maxsus radio buldıru kiräk digän täqdim belän çıqtı häm Pol''şa bu ölkädä inde Ukraina wä Litva belän kiñäşläşülär alıp bara dip belderde.

Kärim Kamal
XS
SM
MD
LG