Accessibility links

шимбә, 10 декабрь 2016, Казан вакыты 15:51

Ufa şähär sovetına namzätlär saylaw aldı eşçänlegen başladı


Elegräk tä xäbär itelüençä, Başqortstanda 26 iyün könne urındağı üzidärä orğannarına saylawlar ütäçäk. Xäzer böten cirdä deputatlıqqa qandidatlarnı terkäw tämamlandı häm bügennän alar üzläreneñ saylawaldı ağitatsiä eşçänlegen başlarğa xoquq aldı. Qandidatlar xäzer matbuğat basmalarında radio häm telewideniedä üzläre xaqında mäğlümat urnaştırırğa häm saylawçılarnı üz proğrammaları belän tanıştırırğa kereşäçäk.

Respublikta urınnardağı üzidärä orğannarına saylawlar köräşeneñ iñ kierenkese möğayın da Ufa şähäre sowetına saylawlarda bulır. Anda äle 35 deputat urını öçen däğwa itüçe 194 keşe terkälgän. Törle säbäplär belän terkälä almağan tağın da illegä yaqın keşe bügenge köndä saylaw qomissiäse belän mäxkämäläşü östendä, dilär. Alarnıñ utızdan artığı respubliknıñ yağulıq-energetiqä tarmağına qarağan şirkätlärneñ törle däräcä citäkçeläre, dip xäbär itelä. Elegräk tä äytelgänçä, Ufa şähär sowetına saylawlar asılda respublik prezidentı Mortaza Räximov tarafdarları belän anıñ ulı Ural Räximov yaqlılarnıñ köräşen xäterlätä. Härxäldä, matbuğat basmalarında barğan propağanda şundıy fikergä kiterä. Mäğlüm buluınça, respublik prezidentı üzeneñ ulı qaramağındağı neft häm energetiqä tarmağı şirkätlären yañadan däwlät qaramağına qaytarırğa bulğaç, ata belän ulı arasında tartqalaş tağın da nığraq köçäyep kitkän ide.

Respublik xaqimiätläre Ural Räximov tarafdarların Ufa şähäre sowetına deputatlıqqa ütkärmäs öçen, alarnı qandidat itep terkätmäskä dä boyırğan digän imeş-mimeşlär dä kiñ taraldı. Moña cawap itep, iyün başında änä şul namzät itep terkälä almawçılar Mäskäwdä piket ütkärergä cıyına ikän. Bu xaqta Başqortstan Berläşkän oppozitsiäse wäkilläreneñ atnaqiç könne ütkän utırışında äytelde. Şulay itep oppozitsiä dairäse tağın da kiñräk qolaç ala kebek.

XS
SM
MD
LG