Accessibility links

дүшәмбе, 5 декабрь 2016, Казан вакыты 23:53

Başqortstan tatar milli oyışmaları qorıltayğa äzerlänä


Başqortstan tatar milli oyışmaları üzläreneñ iyün ayınıñ 22nçe könendä ütäçäk qorıltayına äzerlänä. Bu cıyınğa centekle äzerlänü öçen, Başqortstan Tatar cämägätçelek oyışmaları berlege idaräse äğzaları yışraq oçraşıp kiñäşläşep torırğa kileşkän ide. Menä comğa könne dä alar Ufada üz utırışın ütkärde häm qorıltayğa äzerlek barışın tikşerde.

Başqortstan Tatar cämägätçelek oyışmaları berlege räise urınbasarı Mäcit Xucin utırışnı açıp, 22 iyündä ütäçäk zur qorıltayğa respublik rayonnarınnan häm şähärlärennän 900gä yaqın wäkil kiläçägen äytte. «Töbäklärdäge tatar milli oyışmaları härberse xäzer üzlärenä aldan bülengän külämdä qorıltayğa deleğätlarnı saylıy häm ul isemleklärne Ufadağı qorıltaynı oyıştıru qomitetına tapşıra, – dide M. Xucin. – Şul uq waqıtta qorıltayda çığış yasarğa tieşle keşelärneñ isemnäre dä mäğlüm inde häm alar üz temnarı buyınça bügennän ük doqladların äzerli». Mäcit Xucin qorıltaynı oyıştıru qomitetına Ufada ütäçäk zur cıyında Başqortstanda tatar telenä dä däwlät statusı alunı taläp itü mäsäläsen kütärü burıçı yöklätelüen dä äytte. «Bu mäsäläne xäl itü yulları turında xoquq belgeçläre belän tağın ber qat kiñäşläşep alğannan soñ, bu çeterekle problemnı barı tik referendum aşa ğına çişep bulaçağı açıqlandı, – di Mäcit äfände. – Qorıltayda bu xaqta täfsille söyläşü bulaçaq. Annan inde referendumnı oyıştıru häm ütkärü buyınça bıltır uq tözelgän oyıştıru qomitetı üz eşen başlayaçaq».

Başqortstan Tatar cämägätçelek oyışmaları berlege räise Ramil Bignov üz çığışında şulay uq qorıltayda kütäreläçäk temnar xaqında üz fikerläre belän urtaqlaştı. Şul uq waqıtta ul qorıltay ütkärü öçen respublik xaqimiätläreneñ bıltırğı kebek ük bina birmäw ixtimallığın da äytte. «Qorıltay ütkärü öçen bina sorap, kiçä bez Başqortstan prezidentı xaqimiätenä xat yulladıq, – dide Ramil äfände. – Kiläse atnada ul xatqa nindi dä bulsa cawap alırğa ömetlänäbez. İnde bu yulı da bina birmilär ikän, qorıltaynı açıq hawada ütkärerbez, xäzer könnär cılı. Ä bina birmäw öçen oyatı respublik citäkçelegenä bulsın».

Älbättä, mondıy fiker belän qayber milli oyışmalar citäkçeläre kileşep betmäde. «Üz respublikbızda qorıltay ütkärü öçen bina da ala almağaç, kiläçäktä başqa taläplärebezne tormışqa aşıru yulında närsä genä eşli alırbız soñ», dip äytüçelär dä buldı. Şulay itep qorıltayğa äzerlek barışın tikşergän kiñäşmä älegä bilgesezlek käyefendä tämamlandı. Aldağı utırış kiläse atna azağına bilgelände.

XS
SM
MD
LG