Accessibility links

пәнҗешәмбе, 8 декабрь 2016, Казан вакыты 17:24

Başqortstanda Sabantuylar başlana


Başqortstanda milli bäyrämebez – Sabantuylar başlana. İñ berençe Sabantuylar şimbä könne respubliknıñ Köyergäze, Stärletamaq häm Baqalı rayonnarında ütäçäk. Yäkşämbe könne dä berniçä rayon xalqı milli bäyrämebezdä räxätlänep yal itergä cıyına. Ä küpçelek rayonnardağı Sabantuylar kiläse atna azağına bilgelängän. Ğomumän, tatar häm başqort xalıqlarınıñ milli bäyräme Başqortstanda 12 iyüngä qädär däwam itäçäk.

Bıyıl da Sabantuylarda xezmät aldınğıların xörmätläw, törle sport bäygeläre, mädäni proğrammalar oyıştıru qaralğan. Här rayon häm awıl bu bäyrämne tantanalı häm zurlap bilgeläwdä xätta üzençä ber yarışqa çıqqan kebek. Respublik citäkçeläre här yılnı Sabantuylarğa Mäskäwdän ilneñ iñ yuğarı citäkçelegennän qunaqlar çaqıra. Ämma mäskäwlär här çaqıruğa da yögerep barmıy. Bıltır da Başqortstanda Sabantuyğa il prezidentı Putin äfände kiläçäk, dip aldan xäbär taratqannar ide dä, läkin kilmäde il citäkçese. Aldan qıçqırğan kükeneñ başı awırta digändäy, xätta uñaysız xäldä dä qaldı respublik türäläre. Bıyıl da şundıy uq xäbär taralıp ölgerde. Xätta internet çeltärendäge qayber säxifälärdä, şul isäptän «tatarlar.ru» säxifäsendä dä «Ufağa 29 mayda Vladimir Putin kilä», digän xäbärne taratqannar ide. Şul xäbärne xätta Tatarstannıñ «Intertat.ru» elektron gäzite dä üzendä urnaştırdı. Bu xäbär kem awızınnan çıqqandır, ämma ul döreslekkä turı kilmi.

Başqortstan xaqimiätläre şulay da ber atna çaması elek Ufağa 28 mayda Rusiä finans ministrı Aleksey Qudrinnıñ kiläçägen raslağan ide. Qudrin äfände Başqortstandağı ber Sabantuyda qatnaşaçaq häm Başqortstannıñ Rusiägä quşıluına 450 yıl tulunı bäyräm itügä äzerlek barışın tikşerü öçen utırış ütkäräçäk, dip xäbär itelgän ide. Ämma Qudrin äfändeneñ dä Ufağa säfäre kiçekterelä bulıp çıqtı. Monıñ säbäbe Mäskäwdäge energetik krizis näticäläre, dip añlattılar. Anısı da dörester, Ufanıñ Rusiägä quşıluı bäyrämenä äle ike yıl çaması waqıt bar, ä Mäskäwneñ elektr problemın bügen ük xäl itärgä kiräk.

Fänis Fätxi, Ufa.

XS
SM
MD
LG