Accessibility links

җомга, 9 декабрь 2016, Казан вакыты 14:34

Etlär, çerkilär häm xalıq yazmışı


Soñğı waqıtta Azatlıq radiosı qayda kitte, Azatlıq yabılğan imeş, şulay meni, digän sorawlar belän radiobıznıñ Qazan byurosına şaltıratıp toralar. Mart. aprel'', may aylarında bez küp tapqırlar bu turıda söyläsäk tä, iğtibar itmägännär. Qabatlap äytäbez, ozın dulqınlı Tatarstan radiosı aşa barğan retranslyatsiä tuqtaldı. Läkin radiobıznıñ qısqa dulqınlı tapşıruları elekkeçä 19,21, 25,31 metrlı qısqa dulqınlarda könenä 4 tapqır qabatlana. Şunıñ östäwenä internet aşa tıñlaw mömkinlege bar häm “Tatarstan - yaña ğasır” radiokanalında 91.5 FM yışlığında täwlegenä ike tapqır efirğa çığa. Tanışlarığızğa, duslarığızğa äytegez. Vremya programması televizor ekranğa çıqqan waqıtta, yäğni kiçke säğät 9да Azatlıqnı tıñlasınnar. Ul waqıtta ölgerä almasağız, şul uq tapşıru irtän 5 belän 6 arasında qabatlana.

Xäyer, radionı iğtibar belän tıñlawçılar häm maqsattan hiç taypılmıy üz yullarınnan baruçılar da oçrıy. Baltaç rayonında informatika häm fizika uqıtqan Räfqät Zaripovqa 64 yäş. Ul yäşlärne uzdırıp komp''yuter, internet belän qızıqsına. Mondıy millättäşlärebez zamança texnologiälärdän qurıqmıylar, kiresençä, alar bu xikmätne üzläre yögänli. Bügen yañğırayaçaq Tatar internetı tapşıruında Räfqät ağay çığış yasayaçaq.

Näq bu comğa könne Qazanda yäşäwçe Räis ağa Ğafurovnıñ xatı bezgä kilep citte, ul Efir telekompaniäse tapşırularında milli oyışmalarnı häm millätpärwärlärne “natsional” dip atawnıñ maqsatı häm mäğnäsen belergä teli. Ğafur ağay Qazan universitetına da möräcäğät itkän, kemnär alar natsionallar, ni öçen jurnalistlar bu süz belän millätne yaqlawçılarnı atıy, dip soraşqan. Qazan universitetı rektorı yärdämçese Ğilemşin cawap birgän häm Efir televidenieseneñ üzennän sorarğa kiñäş itkän. Räis ağay Ğafurov barıber tuqtalıp qalmıy.

Menä şundıy keçkenä genä, waq qına mäs''älälärdä zur säyäsät häm xalıq yazmışı çağılıp kitä. Tatarstan Däwlät Sovetı tübäsendä respublika bayrağı cilferdi. Mäskäw yağınnan kilgän kürsätmädä Rusiä bayrağın elärgä quşılğan. Şuşı 3-4 kvadrat metrlı tuqımanı elmäsäñ, mäxkämä. Döres, bu böten Rusiä parlamentı tügel. Ä Tatarstan Däwlät Sovetınıñ deputatları utırğan bina. Cilferdäsen inde şunda yäşel, qızıl, aq töstäge Tatarstan bayrağı. Konstitutsiägä dä yazılğan bit, respublika däwlät ul digän, anıñ üz atributları, gimnı, bayrağı bula digän. Änä, bit, Lukoyl kompaniäseneñ dä. Zur tämäke firmasınıñ da bayrağı, tuğrası ällä qaydan kürenep tora.

Üzeneñ baş ofisında. Xosusıy firma yäki aksionerlar oyışmasınıñ äläme cilferdägännän ni zıyan? Xikmät şunda, federatsiä sub''yektıñ bayrağı räsmi binada berüze tırpayıp torsa, fetnä bulıp toyıla. Qurıqqanğa quş kürenä dilärme äle?

Änä, Tön''yaq Osetiädä şuşı respublikanıñ prezidentı üzen prezident dip yörtkängä oyala, di. Ä nigä Tatarstan prezidentı da şuşı aldınğı täcribägä quşılmıy, dip bäylänüçelär bar. Ğäcäp! Moñı cawap birer öçen süz tabıp bulmıy.

Azatlıq radiosı ni bar – açısımı, töçeseme – şunı söyläp torır. Ber tıñlawçı şaltırata, uram etläre turında qatı söylädegez, di. Elek Azatlıq kommunistlar xakimiäten sügä ide, ä sez etkä bäylänäsez. Bäylänmi ni, bezneñ intekkän, teşlängän suveren respublikabıznıñ bolay da räncetelgän balaların qurqıtıp, teşläp, meñyıllıqqa bizälgän uramnarnı pıçratıp yörmäsennär. Änä, Parijda da distä, meñlägän etlär Eyfel'' manarası tiräsendä öyerelep yörmi, di, gel matur qızlar, şäp yegetlär, borınğı häykällär.

Ä nigä äle tatar başqalası şundıy qalalardan ürnäk almasqa tieş? Ser itep äytäm, Azatlıq radiosınıñ Qazan byurosınıñ icadi planında çerkilär turında da tapşıru niätläre bar. Bu bit tundra, Seber sazlıqları tügel. Meñyıllıq qala. Nigä äle Bolaq, Qaban yarlarında, Qazansu yarlarında milliardlağan çerkilär ürçep yatıp, bezneñ xörmätle qunaqlarıbıznı häm dä äle üzebezne, balalarıbıznı, xäläl cefetlärebezne, señellärebezne teşlärgä tieş alar. Bar di bit alğa kitkän illärdä çerki oyaların häm yomırqaların ağulap, näsellären kimetä torğan darular. Qazanda sanepidstansiä keşeläre bu turıda uylıy başladı inde. Bitlek kiep, maxsus darular tutırğan çiläklär kütärgän keşelär Qazansu buyında yöri inde. Ex, menä şul şähär uramnarında, işek allarında cıyılıp torğan sular, çoqırlardağı keçkenä sazlıqlar belän köräş programması bulsa! Bayraqlarğa bäylänäse urınğa, menä şul waq bälälärne ciñsäk, yarıysı ğına däwlät kilep çığar ide. Azatlıq radiosı öçen waq-toyaq närsä yuq, xätta etlär, çerkilär dä bezneñ tapşırular qaharmanı bula ala, ägär dä alar xalıq yazmışına tä''sir itsä. Rimzil Wäli

XS
SM
MD
LG