Accessibility links

Кайнар хәбәр

Tatar kinosı Mäskäwdä


26 mayda Mäskäwdä Üzäk Kino yortında Tatarstan kino sänğäte täqdim itelde. Biredä berniçä dokumental' tasma kürsätelde Häm tamaşaçılarnı iñ tä'sirländergäne rejisser Ramil Töxfatullinnıñ Ğayaz İsxaqi äsäre buyınça eşlängän “Zöläyxa” näfis fil'mı buldı. Fil'm “Ramay” studiäsendä eşlängän. Tasmalarnı täqdim itüdä rejisser Ramil Töxfatullin häm fil'mda Zöläyxa rolen uynağan İnsiä Töxfatullina da qatnaştı. Ramil Töxfatullin üzeneñ çığışında Tatarstanda yaña studiä oyışuın. Näfis fil'mnar töşerü däwam iteläçäk, şulay uq balalar öçen tatarça mul'tfil'mnar da töşereläçäk dip belderde. Bu tamaşağa xalıq bik küp kilgän ide. Xalıq Tatarstan kinoçıların alqışlarğa kümde. Şulay da tiskäre fiker äytüçelär dä buldı. Mäsälän Watan partiäse räise Möxämmät Minaçev: “Yılaw da yılaw, nigä xalıqnıñ köräşen kürsätmilär. Mondıy tasmalar kiräk tügel” - dip äytte. Läkin başqa andıy fiker belän urtaqlaşuçı bulmadı.Barlıq tamaşaçılar da iskitkeç qänäğät buluların belderdelär Fil'mnarnı täqdim itüdä şulay uq Rusiäneñ Yevropa öleşe dini idäräse häm Rusiäneñ möftilär şurası räise Rawil xäzrät Gaynetdin dä bar ide. Ul da tasmanı kürsätü tämamlanğannan soñ kiçereşläre belän urtaqlaştı häm tasmanı töşerüçelärgä zur räxmätlären belderep, uñışları belän qotladı.

İke säğät buyı tamaşaçı fil'mnıñ baş geroe Zöläyxanıñ açı yazmışın küñelennän kiçerep utırdı. Min İnsiä Töxfatullinadn bu rol'ne niçek tudıruı turında soradım. Ul: fil'm ike yıl buyı töşerelde. Bu säxnädä uynaw belän çağıştırtırlıq tügel. Kinonıñ üz qatlawlığı, üzenä genä xas üzençälege bar. Rol' üze dä nıq kiçereşne taläp itä torğan rol' dip söyläde. Şulay itep Mäskäwdä 26 mayda Tatarstan kinoçıları Mäskäw tamaşaçıları belän oçraşu ütkärep, tatarlarda ğorurlıq xisläre uyatıp zur büläk yasadılar.

Näzifä Kärimova, “Azatlıq” radiosı, Mäskäw

XS
SM
MD
LG