Ministr urınbasarı yazuçılarnı citäklärme?

Tatarstan yazuçılar berlegeneñ 15 qorıltayı Comğada Qazan-mill-mädäni üzägendä başlandı. Älege xäbär äzerlängändä ul däwam itä ide. Yazuçılar qorıltayğa öç yılğa ber märtäbä cıyıla. Bügenge köndä bu berlektä 307 yazuçı äğza bulıp tora. Comğada eşen başlağan 15 qorıltay isä yaña räis saylarğa tieş. Çönki berlek Ustavı buyınça ber ük keşe ike märtäbä genä räis bula ala. Soñğı ike qorıltayda Foat Ğalimullin räis bulıp saylanğan ide.

15 qorıltaynı Tufan Miñnullin açtı. Ğädättä, mondıy wazifanı iñ ölkän yazuçı başqara ide. Bu oçraqta, iñ ölkän yazuçılardan Mösäğıyt Xäbibullin sanalsa da, ni öçender Tufan Miñnullinğa bu wazifa yöklätelgän ide. Qorıltay eşendä Tatarstan premyerı Röstäm Miñnexanov, premyer urınbasarı Zilä Wälieva, Däwlät şurası räise urınbasarı Rimma Ratnikovalar da qatnaştı.

Ğädättägeçä, räis qorıltay arasında başqarılğan eşlärgä yomğaq yasadı. Häm kiläçäkkä plannar bilgeläde. Ä ul plannarnıñ säyäsi öleşe dä bar. Ul da bulsa, Tatarstan yazuçılar berlegeneñ Rusiä yazuçılar berlege belän berläşer çaqıru. Foat Ğalimullin çığışınnan ber özek

Bilgele bulğança, bezneñ Ustavta mondıy bäyläneşlär qaralmağan. Ämma bügenge şartlarda mondıy zur oyışmanı dönyadan, zur ildän ayırıp quyu aqlamıy. Çönki Tatarstan respublikası böten yaqtan da meñärlägän ceplär belän Rusiä belän bäylängän. Şuña kürä, bez yazuçılar ğına çittä torıp qala almıybızdır. Şunısı da mäğlüm, üzgärtep qoru yıllarında ber genä Tatarstan icat oyıması da Rusiä icat oyışmaları belän aranı özmäde. Kompozitorlar da, rässamnarda, arxitektorlarda, teatr ähelläre berlekläre dä Rusiä belän araların özmädelär. Kompazitorlar berlege äğzası ikän, ul Rusiä kompozitorlar berlege äğzası da sanala. Yıraq barası tügel, üzebezneñ Ädäbi fondta, Rusiä belän arasın özmäde. Rusiä Ädäbi fondı yärdäm itep tormagan bulsa, Tatarstan ädäbi fondı yäşi almağan bulır ide. Monı xäl itüneñ ber genä yulı bar: Rusiä Yazuçıları berlege belän Tatarstan yazuçılar berlege arasında şartnamä nigezendä mönäsäbätlär urnaştıru. Kerü tügel, ä şartnamä belän, tigez xoquqlar nigezendä

Foat Ğalimullin Rusiä yazuçılar berlege belän bağlanışlarğa çaqırsa da, älege mä’sälä berlek utırışlarında inde yıldan artıq tikşerelä. Küp kenä yazuçılar Rusiä yazuçılar berlegenä kerügä qarşı. Şul uq waqıtta, Foat Ğalimullin şäxsän üze Rusiä yazuçılar berlegendä küptän tügel äğza bularaq qabul itelgän.

Qorıltayda Tatarstan premyerı da, respublika xakimiäte häm parlamentı isemennän çığış yasadı. Üzeneñ çığışınnan soñ ul, ber törkem yazuçılarğa Rusiä häm Tatarstan däwlät büläklären tapşırdı. Soñınnan isä yazuçılar berlegenä büläk yasadı

Süz baylığı belän sezne şaqqattırıp bulmıy inde, sez barığız da miña qarağanda ostaraq. Menä şuña kürä, citäkçelär isemennän ber büläk, yazuçılar berlegenä mikroavtobus

Tatarstan yazuçılar berlegendäge 307 äğzanıñ 50 läbe genä urıs telle yazuçılar. Şuña qqaramastan, qayber yazuçılar urısça söylädelär. Berlekneñ reviziä komissiäse räise dä urısça xisap birde. Ä şulay uq yazuçılarğa matdi yärdäm itü belän şöğellänüçe Ädäbi fond räise, şağir Gäräy Räxim isä notığın tatarça tottı. Anıñ çığışınnan ber özek

Bez älbättä, yazuçılarğa ber tienlek tä yärdäm itmägän Rusiä Ädäbi fondınnan çıqtıq. Alar böten mileklären satıp beterdelär. Ä bez, SSSRnıñ elekkege respublikaları belän berlektä, tigez xoquqlar nigezendä, Xalıqara ädäbi fond oyıştırdıq. Foat Ğalimullin bu mä’sälädä yalğışlıq cibärde. Bez Rusiä Ädäbi fondına qatnaşmıybız. Tatarstan Ädäbi fondınıñ xäle möşkel. Bezneñ xätta, alğan äyber-büläklärebezne yazuçılarğa taratır öçen maşinabız da yuq. Bügen premyer büläk itkän maşinadan bezgä dä öleş çığar dip ömetlänäm

Şulay itep, äle açqıçı ğına qullarında bulğan yazuçılar berlegenä dä, premyer büläk itkän maşinağa iälänü dä qorıltayda uq başlandı.

Tatarstan yazuçılarınıñ 15 qorıltayı, äle bu xäbär äzerlängändä däwam itä häm ul tönge unberlärgä qädär bulır dilär yazuçılar. Bu xäbär äzerlängändä, Qorıltayda iñ mawıqtırğıç mä’sälä tikşerelä. Berlekneñ räise kem bulaçaq. İnde, äytelgänçä, berlekne 6 yıl buyına Foat Ğalimullin citäkläde. Ul üzeneñ xisap çığışında uq, sawbullaşu süzlären äytte

Monnan altı yıl elek, sez miña zur ışanıç kürsättegez. Min üzemneñ urınbasarlarıma zur räxmätemne belderäm. Tırışıp eşlädek. Minem soñğı altı yılda böten maqsatım yazuçılarğa mömkinleklär tudıruda ide. Min küp kenä yazuçılar belän dustanä mönäsäbät urnaştırırğa tırıştım. Qayberläre belän kileşterep beterä almadım ikän, alarda immunitet bar. Yäğni nindi genä oçraqta da urtaqlıqqa barmaw. Barığızğa da räxmätläremne belderäm.

Räsmi bulmağan çığanaqlarğa qarağanda, berlek räise itep , Möxämmät Mirza isemle ädäbi täxällüs belän icat itüçe İlfaq İbrahimov yaña räis bulıp saylanuı mömkin. İlfaq İbrahimov, bügenge köndä Tatarstan mädäniät ministırı urınbasarı bulıp tora.

Qorıltay eşendä ğädättä Tatarstan prezidentı da qatnaşa ide. Bu yulı ul Sankt Peterburgnıñ şähär könendä qatnaşu säbäple kilä almadı dip belderdelär.

Räfis Cämdixan