Accessibility links

шимбә, 3 декабрь 2016, Казан вакыты 22:52

Peterburnıñ 302 yıllığında tatarlar da qatnaştı


26 mayda gubernator Valentina Matvienko çaqıruı belän Tatarstan respublikınıñ prezidentı Mintimer Şäymiev räsmi säfär belän Peterburğa kilde. Ber könlek kenä bulu säbäple, säfär bik tığız, här minutı diärlek aldan uylap quyılğan ide. 27sendä irtänge unda Mintimer Şäymiev Piskarevka memorial ziratında ide. ”Watan-ana” häykälenä häm Dan alleyäsında tatarstanlılarnıñ xäter taqtasına çäçäklär saluda prezident belän bergä Qazan şähäre başlığı Kamil İsxaqov, vitse-prezident Aleksandr Vaxmistrov häm başqa räsmilär qatnaştı. Tantana başlanır aldınnan bulğan berniçä minutnı Mintimer Şäymiev millättäşlärebez belän aralaşuğa bağışladı. Piskarevka muzeyenda Maqtawlı qunaqlar kitabında awtoğrafın qaldırdı.

Annan prezident kortejı Petropavlovkağa yul aldı. Petr patşağa çäçäklär salğannan soñ räsmilär, tatar cämğiäte wäkilläre, şähärneñ maqtawlı grajdannarı (alar arasında Kiril Lavrov, yazuçı Daniil Granin) Narışkin bastionına kütäreldelär. Professional bombardirlarnıñ keçkenä däresennän soñ näq säğät 12 dä Mintimer Şäymiev bäyräm zalpı yasadı. Ä inde Peterburnıñ 302 yıllığına bağışlanğan bäyräm tantanası Patşa bastionında ütte. Räsmi çığışlardan soñ Mintimer Şäymievnıñ yöräktän çıqqan mäğnäle dä, uyın-kölkele dä çığışın cıyılğan xalıq cılı qabul itte:

Audio

Şähärneñ bäyrämgä maxsus çaqırılğan maqtawlı qunağı bularaq, prezidentıbızğa başlıça rusça süz alıp barırğa turı kilde, ä şulay da “Azatlıq” radiosı tıñlawçıları öçen berniçä süz üz telebezdä dä äytte:

Audio

Mintimer Şäymievnıñ räsmi säfäre Smolnıyda tämamlandı. Anda süz ike şähärneñ mädäni, iqtisadi, tarixi bäyläneşläre turında bardı. Mintimer Şäymiev küpsanlı jurnalistlarnıñ küp sanlı sorawlarına bik teläp cawap birde. Törle töbäklärneñ citäkçelärenä yışraq Peterburda bulırğa kiräk, ul bik yaxşı zaryad, yäşäw energiäse birä, dip yomğaq yasadı Mintimer Şäymiev.

Peterburg 3 kön däwamında üzeneñ 302 yıllığın bäyräm itte. Bäyrämneñ berençe köne turında “Azatlıq” radiosı tıñlawçılarına bez inde söylägän idek. Söylägännärgä östäp şunısın da äytergä kiräk, traditsiä buyınça Peterburgnıñ tuğan köne aldınnan Qanunnar cıyılışı şähärneñ maqtawlı grajdannarın saylıy, bıyılğı saylawlarğa täqdim itelgän 8 keşe arasında Peterburg Cämiğ mäçeteneñ imam xatibı Cäfir xäzrät Ponçayıv ta bar ide. Tik deputatlar şähärneñ maqtawlı grajdannarı bulırğa yazuçı Daniil Granin, “Vodokanal” citäkçese Feliks Karmazinov layıq dip taptılar, bäyräm könne alarğa maxsus bilge tapşırıldı. Ä inde mädäni häm küñel açu çaralarına kilgändä, şähär 3 kön buyı görläp tordı. İñ xäterdä qalğanı bik küp keşe qatnaşlığındağı karnaval bulğandır. Karnaval öçençe tapqır uzdırıla häm, äytergä kiräk, yıldan yıl oyışqanraq, masşablıraq bula kilä. Eşlär bolayraq torsa, belgeçlär äytüe buyınça, bez berniçä yıldan Braziliäne quıp citäçäkbez, imeş. Küñel açırğa öyrändek, inde çüp öyemnäre qaldırmasqa da öyränsäk. Yuğisä, bäyrämnän soñ Neva prospektı, Saray mäydanı bixisäp zur çüplekkä äylängän ide.

Yäkşämbe kön millättäşlärebez öçen ikelätä bäyräm buldı. Ul da bulsa, Älmira xanım Tahircanova äzerlägän yaña turistik ekskursiä marşrutı - Fontanka , Moyqa yılğaları, Kryukov kanalınıñ arxitekturası, tarixı häm, iñ möhime, tatarlar belän bäyle urınnarı.

Belüegezçä, tatarlar Peterburda berençe könnärdän ük: berençe tözüçelär dä alar, ğäskärilär dä, fän häm mädäniättä yaqtı ez qaldıruçılar da, Rusiä sänäğäten kütärüçelär dä:

Audio

Älmira xanım Tahircanowa berençe ekskursiäne rus telendä alıp bardı, ämma, hiçşiksez, tatarça variantı da bulaçaq dip ışandırdı Älmira xanım:

Audio

Arça qunağı Rämilä xanım ekskursiädän alğan täesiratları belän büleşte:

Audio

Gölzadä Kamalova, Sankt- Peterburg

XS
SM
MD
LG