Accessibility links

шимбә, 10 декабрь 2016, Казан вакыты 16:01

Atilla Koç: “Qazan Törkiä üseşenä dä zur öleş kertte”.


Tatarstan, Äzerbäycan, Qazaqstan, Qırğızstan, Saxa(Yaqutiä), Törekmänstan, Törkiä, Başqortstan, Altay, Tuva, Xaqas, Gagauz illärneñ mädäniät ministrları, TÜRKSOY äğzaları qatnaşqan utırış bıyıl Qazannıñ 1000 yıllığına bağışlap uzdırıla häm ul ike kön däwam itäçäk.

TÜRKSOY sammitı Qazanda ikençe tapqır uza. Anıñ berençese 1998 yılnı oyıştırılğan ide.

Düşämbe könne uzğan tantanalı açılışta TR Premyer-ministrı urınbasarı – Mädäniät ministrı Zilä Wälieva TR Prezidentınıñ qotlawın uqıdı. Şulay uq Rusiäneñ mädäniät häm telekommunikatsiälär ministrı Aleksandr Sokolovnıñ täbrikläwen citkerde.

Qotlawlardan soñ TÜRKSOY waqıtlıça koordinatorı İldus Tarxanov uzğan yılğa xisap yasadı. Şular arasında TÜRKSOY tarafınnan Ğayaz İsxaqinıñ icadi mirası turında tatar häm törek tellärendä kitap bastıru ideyäse xuplanuın äytep uzdı. Rossiä Federatsiäse Mädäniät häm massaküläm kommunikatsiälär ministrlığı belän berlektä üzençälekle proyekt ğämälgä aşırıluı – Tatarstanğa bağışlanğan “Rossiä Federatsiäse xalıqları mirası” jurnalınıñ maxsus sanı dönya kürüen belderde. Ul “Tatarstan xäzinäläre” dip atala häm Qazannıñ 1000 yıllığına bağışlana. Sentäberdä “Altın Mönbär” isemle xalıqara kinofestivale uzaçağı bilgeläp uzdı. Älege festival'gä 25 törki telle däwlättän kinematografistlar çaqırılğan. Şularnıñ 8 TÜRKSOY äğzaları.

Utırışnıñ ikençe öleşe törle respublikanıñ ministrları häm wäkilläre çığışlarınnan tordı. Äzerbäycan respublikası Mädäniät ministrı, TÜRKSOY nıñ general' direktorı Polad Byulbyul' uğlı sälämläwennän ber özek

Xörmätle tuğannar, duslar darığıznı da älege utırışqa cıyılu belän qaynar qotlıym. Bezne TÜRKSOYğa qabat tuğanlıq, duslıq xisläre cıydı.

TÜRKSOY Awraziädä mädäniät küpere rolen uynıy häm säyäsi maqsatlardan çittä tora.

Törkiäneñ Mädäniät häm turizm ministrı Atilla Köç Qazannıñ tarixi şähär buluın häm Tatarstannıñ küp kenä yazuçılarnı tärbiäläwen äytte. “Alarnıñ qayberläre Törkiä üseşenä dä zur öleş kertte” – dip bilgeläde Atilla Köç.

Barlıq Xökümät wäkilläre utırışta çığış yasap, törki dönyanıñ baylığı häm küptörlelege, mädäni häm tarixi mirasnı saqlaw häm üsterü, TÜRKSOYnıñ maqsatları turında bäyän ittelär.

Törki dönya baylığınıñ ber misalı bulıp – älege utırıştan soñ açılğan törki illär rässamnarınıñ “Fätxiä – 2004” TÜRKSOY kürgäzmäse tora. Äytergä kiräk, 1998 yıldan birle Törkiäneñ tarixi-mädäni häm turistik üzäklärendä yıl sayın icat laboratoriäläre ütkärelä. Anıñ kolleksiäsendä barlığı 390га yaqın äsär bar. 1000 yıllıq uñayınnan Qazanda uza torğan kürgäzmädä rässamnar “Ay” teması fälsäfäsen köçäytälär häm anı üz räsemnärendä törleçä faydalanalar. Kürgäzmä belän tanışqaç, anda ber ciñüçe bilgelänäçäk.

Landış Xarrasova

XS
SM
MD
LG