Ğiraq başqalasınnan könyaqtaraq Hilla şähärendä 2 intixarçı elekke politsiä xezmätkärläre törkeme arasında bomba şartlattı. Kimendä 27 keşe hälak bulğan dip xäbär itelä.
Politsiä äytüençä şartlatuçılar xakimiät binası yanında xezmät xaqların alu öçen cıyılğan elekke politsiä xezmätkärläre arasında ütep kergän.
Berençe intixarçı bombanı törkem urtasında şartlatqan. İsän qalğannar qaça başlağaç ikençe intixarçı alar artınnan yögerep yaqında tağın ber bombanı şartlatqan.
Yözdän artıq keşe yaralanğan.
İnternettağı iğlannarda bu höcümnär öçen cawaplılıqnı Äl-Qaidäneñ Äbü Musab äz-Zärqäwi citäklägän Ğiraqtağı bülege üz östenä aldı.
Ğiraqta AQŞ xärbiläre Sönni Möselmannar partiäseneñ citäkçesen totqarlap soñraq irekkä çığardı.
AQŞ xärbiläre Ğiraq İslam Partiäseneñ räise Möxsin Ğäbdel-Xämitne yalğışlıq belän totqarlağannarın belderep aña kitergän qıyınlıqlar öçen ükeneç belderde.
