Accessibility links

Кайнар хәбәр

«Näwrüz» festivalendä 18 milli teatr qatnaşa


Qazanğa, 30nçe maydan - 5 iyundä qädär Näwrüz festivalenä, 18 milli teatr kilde. 30 may kiçendä, Qazanda, Törki xalıqlarnıñ «Näwrüz» festivale açılıp, eşen başlap cibärde. Belgänegezçä, Näwrüz festivale, TURKSOY oyışması utırışı belän ber uq waqıtta bara. Näwrüz festivaleneñ açılğıçında da, TURSKOY ga kergän ministrlar qatnaştı. Açılış tantanası, Kamal teatrı qarşında ütte. Törle xalıqlarnıñ teatr wäkilläre üz millätlären milli kiemnäre häm cırları belän tanıttı. Xaywan tiresennän tegelgän kiemnär, çigüle, täñkäle külmäklär, timer bizäkle taclar, qılıçlarnı, dumbranı, moldova şäräbe belän tulğan sawıtlarnı kürep, Qazan tamaşaçısı alarnı foto räsemgä töşerergä tarıştı. Näwrüzgä kilgän törki teatrlar arasında, Törkiä, Çuaşstan, Xaqas, Qırğızstan, Qazaqstan, Yaqutiä häm Azerbaycan teatrları bar. Alar belän bergä festival’dä, M.Fäyzi isemendäge Orenbur tatar drama teatrı, Minzälä, Qazan yäş tamaşaçılar, Kärim Tinçurin häm Ğäliäskär Kamal tatar teatrları qatnaşa. Ufadan tatar «Nur» häm başqort «Mäcit Ğafuri isemendäge» teatrlar da iñ köçle säxnä äsärlären kürsätäçäk. Açu tantanasında, festival qunaqların täqdim itkändä, alar här berse üz tellärendä sälämläp, Qazannıñ 1000 yıllığına cotlawların äytep, milli cırların başqardı. Mäcit Ğafuri isemendäge Başqort däwlät drama teatrı, başqort telendä, Qazannıñ 1000 yıllığı häm tatar-başqort duslığı turındağı cır belän sälämläde.

Ğafurilılar, Mostay Kärim pyesası nigezendä quyılğan «Ozın-ozaq balaçaq» äsären kürsätäçäk. Ä «Nur» teatrı Anton Çexovnıñ «Öç señel, yıllar uzğaç» digän spektaklen täqdim itärgä cıyına. Festival’dä tağın Altay, Tıva, Yaqut häm Xaqas milli tatarları da qatnaşa. Alar Näwrüzne açu tantanasında ızlaw qatış, milli moñnarın suzdı. Festival qunaqların xökümät räise urınbasarı häm mädäniät ministrı Zilä Wälieva häm TURKSOY oyışması direktorı Palad Bol Bel uğlı da sälämläde.

«Näwrüz» festival’neñ berençe könendä Kamal teatrı binasında Zölfät Xäkimneñ «Telsez Küke» äsäre kürsätelde. Ä 31nçe mayda, ber yulı 3 säxnädä festival äsärläre uynala, Kamal teatrında İstanbul teatrı «Üzen üze üterüçe» äsären kürsätä, Kärim Tinçurin teatrında, Qırğız drama teatrı «Korol Lir» digän Şekspir äsären quya. Ä Yäş tamaşaçılar teatrında, festival qunağı Minzälä teatrı «Sönnätçe babay» äsären kürsätä. Milli teatrlar kön sayın diärlek bara. Festival barışı turında bezneñ köndälek xäbärlär çığarılışlarınnan belä alırsız.

Bikä Timerova.

XS
SM
MD
LG