Accessibility links

чәршәмбе, 7 декабрь 2016, Казан вакыты 17:31

Balalarnı yaqlıy alabızmı?


“Qazan yärminkäse”ndä “Sport - döres yul!” digän şiğer astında strinbol uyını buyınça yarışlar, Milli bank, “Samuray” kafesı qarşındağı mäydançıqlarda konsertlar, Bauman uramında buşqa tuñdırma satu häm Qazanda 1 iyün könne oyıştırılğan başqa bik küp çaralar barısı da balalar öçen ide. Alar arasında iğtibarnı cälep itkäne ul üzäk balalar kitapxanäsendä açılğan muzey. Balalarda ädäbiätkä qarata mäxäbbät üsterü telägennän açılğan bu muzeynıñ äle eşläre küp. Tik şulay da Tuqay poçmağı digän maxsus bülege inde äzer. 1 iyün könne muzeyğa kilgän bala-çağağa Ğabdulla Tuqaynıñ ağaç bişegen, çabatasın, sawıt-sabaların kürü genä tügel, ä xätta alar belän uynap qararğa da nasıyp buldı.
Şulay da gönahsız sabıylar şatlığı Xalıqara balalarnı yaqlaw köne belän genä çiklänmäsä ide. Respublika citäkçelege tarafınnan qabul itelgän programmalar, zakonnar balalarnı, ä bigräk tä yätimnärne, invalidlarnı yaqlawğa yunälgän. Saw-sälämätleläre, matdi yaqtan uñışsız ğailädän bulğan balalar öçen “Ğailä” üzäge eşläp tora. Ğomumän respublikada balalar öçen şaqtıy küp üzäklär bar. Tik ata-ana nazın, älbättä, bernindi üzäk tä alıştıra almıy. Häm soñğı yıllarda respublikada asrawğa bala aluçı ğailälär sanı arta. Ğäziz balaları yanına çittägelären dä üz qanatı astına sıydırğan ata-analar monıñ öçen maxsus eş xaqın ala, eş stajların däwam itterä. Şulay da, ni qızğanıç, respublikada uram balaları sanı kimemi. Ministrlar kabinetınıñ sotsial' yaqlaw bülege mödire Säriä Saburskaya bezdä besprizornik yäğni uram balaları yuq ul dip beldersä dä, statistik mäğlümatlarğa qarağanda respublikada 600дән artıq uram balası terkälgän. Tağın şundıy mäğlumat - şuşı yılnıñ yanwar-aprel' aylarında ğına da yäşüsmerlär tarafınnan 12 keşeneñ ğömere özelgän. Bu uzğan yıl däwamında balalar eşlägän üterülär sanına tiñ. Ämma yıl äle uzmağan häm aldağı yubiley aldı aylarında bu san tağın ike tapqırğa artaçaq dip farazlıy belgeçlär.
“Vremya i dengi” gazetı xäbär itkänçä soñğı dürt yılda üz üzenä qul salğan yäşüsmerlär sanı da artqan. Uzğan yılda ğına da üz teläge belän 37 yäşüsmerneñ ğömere özelgän. Balalarnıñ suitsid yäğni üz üzenä qul saluınıñ säbäbe itep belgeçlär iñ äwäl ğailädäge nizağlarnı atıy. Aç-yalanğaç bala kürmägän ata-ana iğtibarın, nazın baynıñ balası da yış qına kürmi. Anı qimmätle uyınçıqlar yäğni aqçalar alıştıra. Dimäk, xökümät, mäktäp, ata-ana küpme genä tırışsaq da, barıber balalarıbızğa iğtibar citmi.
Al'bina Zäynulla

XS
SM
MD
LG