Accessibility links

Кайнар хәбәр

Fänis Gaynetdinov: “Qazannıñ bäyräme tınıç ütärgä tieş”


Qazannıñ zur yubileyı aldınnan xalıq arasında imeş-mimeşlär taraldı: tantanalarğa teläsä kemne kertmilär ikän, maxsus propusklar belän genä yörergä mömkin ikän, dilär, şähärdäge maşina xucalarınıñ yartısı pravasız qalaçaq ikän häm başqalar. Älege sorawlarğa “Tatarstan yäşläre”neñ pänceşämbe sanında respublikanıñ eçke eşlär ministrlığınıñ cämäğätçelek tärtiben tä'min itü idäräse başlığı Fänis Gaynetdinov bolay cawap birä. Bäyräm uñayınnan respublikağa 14 meñläp militsioner çaqırılğan.
Meñellıqqa bağışlanğan bäyräm çaraları 60tan artıq urında uzaçaq, şularnıñ 23 ayıruça citdi. Märtäbäle qunaqlar yörgän cirgä ğadi xalıq ütep kerä almayaçaq, älbättä, ä başqa yal mäydannarında teläsä kem kilä ala, dip beldergän Fänis äfände. Başqa yıllardan ayırmalı bularaq, bıyıl Yärminkä mäydanı tulısınça bülep alına, anda kergänçe berniçä kontrol' punkt aşa uzası. Qazanda bügen maxsus videokameralar belän küzätü sisteması da quyıla. Dimäk, bäyräm waqıtında böten xalıqnı ekrannar aşa küzätep utıraçaqlar. Bu Rusiädä berençe şundıy sistema.
Meñlägän keşedän torğan delegatsiälär arasında iñ märtäbälese, älbättä, Rusiä prezidentı Vladimir Putin häm BDB illäre citäkçeläre törkeme bulaçaq. Bu uñaydan Qazanda 27-28 avgustta Bäysez Däwlätlär Berdämlege sammitı uzaçaq. Fänis Gaynetdinov äytüençä, bäyräm waqıtında bik küp maşina xucalarınıñ maşina yörtü xoquqları alınaçaq digän süz döres tügel. Älbättä, citäkçelär kortejı uzğan waqıtta uramnar yabılaçaq, - di ul – läkin bu waqıtlıça ğına bit. “Molodej' Tatarstana” gazetı isä başqaça mäğlumat birä. Biredä üzäktäge ber rayonnıñ eçke eşlär idäräse xezmätkäre bäyrämgä qädär 6 meñ keşene pravasız qaldıru boyırığı turında xäbär itä.
“Tatarstan yäşläre”nä birgän äñgämäsendä Fänis Gaynetdinov xucasız äyberlärdän şiklänep, bomba tügel mikän, dip çıltıratular yışayğan di. Xoquq saqlaw orğannarı här oçraqnı centekläp tikşerergä, saperlar çaqırırğa tieş, di ul. Allağa şöker, moñarçı respublikada ul-bu bulğanı yuq, bäyrämnär tınıç uza. Bıyıl da matur ğına ütkärep cibärerbez, di Fänis Gaynetdinov. Qazanğa rayonnardan da militsionerlar kilä bit, bäyräm waqıtında rayonnarda cinayätçelek artmasmı digän sorawğa ul, yuq, bez moña yul quymayaçaqbız dip cawap birde.
Al'bina Zäynulla
XS
SM
MD
LG