Accessibility links

дүшәмбе, 5 декабрь 2016, Казан вакыты 19:43

Fäwziä Bäyrämova: Meñ yıllıq citä başlağaç, bağana şartlatular tağı da artırğa mömkin


Çärşämbe irtäsendä Tatarstannıñ Teläçe rayonındağı Nırsı awılı yanındağı köçle vol'tle elektr bağanasınıñ awuı zur yañğıraş aldı. Bu xaqta Azatlıq radiosı xäbär itkän ide. İminlek orğannarı elektr bağanası şartlaw arqasında buldı dip baralar.

Başta uq şunı äytep ütärgä kiräk, saqlanu orğannarı tarafınnan terrakt dip bäyälängän bağana teräge awu arqasında bernindi ülem-kitemnär bulmadı, allağa şöker. Kinderle- Bökäş –Sentral'naya dip atalğan elektrütkärgeç liniädä elektr birü özelgän bulğan, läkin Tatenergo cämğiäte tiz arada elektr birüne cayğa salğan. Şundıy tiz arada bötenese cayğa salınuğa qaramastan, Teläçe rayonı prokuraturası Rusiä Cinayät kodeksınıñ 205 matdäse buyınça, yäğni terrorizm bulğan dip cinayät eşe açqan.

“Azatlıq” radiosına väzğıyätne, Tatarstan prokurorınıñ ölkän yärdämçelçe İldar Möxämmätcanov bolay dip belderde

Tiz arada Teläçe rayonı prokurorı, belgeçlär, Tatarstan prokuraturasınnan kilgän belgeçlär, maxsus tikşerüçelär şartlaw bulğan urınğa bardılar. Tikşerü barışında säğät mexanizmı qaldıqları häm şartlawda qullanıla torğan matdälär tabıldı. Bu planlaştırylğan şartlatu bulğanlıqnı añlata. Mondıy oçraqlarda tikşerü eşe niçek bulırğa tieş, şundıy ısullar belän tikşerü bara. Monıñ belän Tatarstan buyınça Federal' iminlek komitetı tikşerü alıp bara. Cinayät tiz arada açılır digän nigez bar. Tikşerüçelär törle versiälär qarıylar .Nindilär ikänlege xaqında min älegä äytä almıym. Läkin, qayber ekstremistik oyışmalar eşe buluı mömkin digän versiä dä qala birä. Xätta, bu töp versiä bulıp qaluı da mömkin. Läkin başqalarnı da qararğa kiräk.

Tikşerü barğan cirdä, qayber mäğlümatlarğa qarağanda, tikşerüçelär yaqın-tirä awıllarda här yortqa kerep, cinayät ezlären ezlilär.

Teläçe rayonında elektr bağanası teräge auğannan çığıp, bez qayber säyäsätçelärgä häm säyäsät belgeçlärenä möräcäğät ittek.

“İttifaq” tatar milli bäysezlek firqäse räise Fäwziä Bäyrämova fikere

Meñ yıllıq citä başlağaç, mondıy bağana şartlatular tağı da artırğa mömkin dip uylıym min üzem. Çönki kemgäder, Tatarstanda xällär tınıç tügel dip kürsätergä kiräk. Maxsus räweştä menä şundıy şartlatular belän şöğellänälär. Küräsez, kemgä bäyräm, kemgä ğailäsenä qayğı artınnan qayğı kilä. Minem uylawımça, qazannıñ meñ yıllığı da tınıç qına ütmäs kebek. Çönki Rusiägä tatarnıñ bu bäyräme kiräk tügel. Minem fikerem elek tä şuşılay ide, xäzer dä şulay bulıp qala. Bu şartlatularnı maxsus orğannar üzläre oyıştıralar. Bu oçraqta mäs'älän, Tatarstanda bulğan şartlatular ul tatar xalqına häm islam dinenä qarşı yünälderelgän. Monda möselmannarnıñ ber nindi qatnaşı da yuq. Äle möselmannarnı turıdan-turı ğäyeplämäsälär dä, möselmannarğa kilep çığaçaq inde. Äle berqayçan da şartlaw bulğannan soñ, berqayçan da nindider banditlarğa kilep çıqqannarı yuq. Yuq cirdä dä möselmannarğa kilep çığalar. Bezneñ täcribäbez bar bit inde xäzer

Säyäsät fännäre doktorı Midxät Farukşin isä, bağana töben şartlatunı ğädäti xuliganlıq dip sanıy

Min monı terror öçen bik tä waq ğämäl dip sanıym . Ägär dä bu şartlaw berär elektrostansiädä, yäki keçkenä stansiädä bulsa da bulğan bulsa, monı citdi räweştä terrorizm çarası bularaq bilgelärgä bulır ide. Qayçan elektr ütkärgeçe bağanaları şartlatalar, bu miña qalsa, keçkenä xuliganlıkka oxşağan. Xoquq saqlaw orğannarına anısı kürenä töşä. Läkin monda ber şundıy soraw tua: terrorizm belän köräşäbez digän küz buyaw yasamıylar mikän? Häm min äyter idem, terrorizmga qarşı köräşkä qatnaşı bulmağan maqsatlar da yuq mikän monda?

Tatar milli xäräkäte ideologlarınıñ berse, Tatarstan xalıq deputatı, akademik İndus Tahirov, Teläçedäge şartlaw nindi genä bulmasın, ğäyepne başqa cirdän ezlärgä kiräk di

Menä şuşı konkret şartlawnı min hiç kenä dä terrakt dip sanamas idem. Ğomumän, menä soñğı waqıtlarda elektrostansiälär eştän çığa tora, elektr liniäläre bozıla tora, şähärlär, awıllar utsız-susız qala. Küpme zarar kilä dönyağa. Şuña kürä, min äyter idem, bu RAO YEEsnıñ citäkçelegeneñ näticäse. Citäkçelegeneñ elektr situatsiäse buyınça tieşle qayğırtuçanlıq kürsätmäwe. Häm üz kesälären genä tutırıp bayıtıp, menä şuşı ilneñ iminlegenä iğtibar birmäwneñ näticäse dip sanıym min

Räfis Cämdixan

XS
SM
MD
LG