Accessibility links

чәршәмбе, 7 декабрь 2016, Казан вакыты 17:25

Uram cıyınnarında qatnaşuçılarğa aqça tülängänme?


Başqortstannıñ Berläşkän oppozitsiäse koordinatsiä şurası citäkçeläreneñ berse, Başqorstan Tatar cämägätçelek oyışmaları berlege räise urınbasarı, professor Mäcit Xucin bügen Başqortstan Eçke eşlär ministrlığına añlatmalar birü öçen oçraşuğa çaqırıldı. Mäcit Xucin östennän Rusiä pensionerlar partiäseneñ Başqortstan bülege äğzaları bulğan 5 xatın-qız respublika eçke eşlär ministrı Rafael Diwayıv isemenä şikäyät xatı yazğan bulğan. Üz şikäyätlärendä ul xanımnar Başqortstan Berläşkän oppozitsiäse koordinatsiä şurası citäkçeläreneñ berse bulğan Mäcit Xucin alarğa «Ufada mitinglarda häm piketlarda qatnaşqan öçen aldan wäğdä itelgän aqçanı tülämäde», dip däğwa beldergän. İmeş, Mäcit Xucin bu xanımnarğa uram cıyınnarında qatnaşqan öçen bilgele ber külämdä aqça tülärgä ışandırğan da, tik soñınnan tülämägän ikän. Menä şuşı şikäyät xatları buyınça Mäcit äfände bügen Başqortstan Eçke eşlär ministrlığında añlatmalar birep qaytqannan soñ, «Azatlıq» radiosına da qısqaça ğına şuşı wäzğiät turında bäyän itte. Mäcit äfände fikerençä, üzenä bulğan ğayepläwlär çın provokatsiä. «Rusiä federal iminlek xezmäteneñ Başqortstan buyınça baş idaräse citäkçese Çernokov äfändeneñ süzlären çınlıqqa çığaru öçen eşlänä bu, – di Mäcit Xucin. – Näq menä ul aprel urtasında Başqortstan telewideniesenä birgän äñgämäsendä dä imeş oppozitsiä citäkçelege piketta qatnaşuçılarğa häm imza cıyuçılarğa 600är sum aqça tüli ikän, digän belderü yasağan ide. Ämma bu xäbär moñarçı bernindi dälil belän dä nığıtılmadı. İnde menä nihäyät, berniçä xatın-qız isemennän Eçke eşlär ministrlığına xat oyıştırılğan. Bu şäxsän miña qarata yasalğan ğäip kenä tügel, ä bar oppozitsiä citäkçelegen respublik cämägätçelege aldında qaraltu öçen maxsus oyıştırılğan ğämäl». Mäcit Xucin süzlärençä, ul bügen militsiä tikşerüçelärenä tege xatta yazılğan däğwalarnıñ barsın da nıqlı dälilläp kire qaqqan. Ministrlıqta Xucin äfände üzenä ğäiplär taşlağan xanımnar belän küzgä-küz oçraşunı taläp itsä dä, anı yañadan soraw aluğa çaqıru xaqında älegä berni dä äytmägännär.

XS
SM
MD
LG