Accessibility links

якшәмбе, 11 декабрь 2016, Казан вакыты 11:02

Tatar ictimaği üzäge östennän mäxkämä däwam itä


Başqortstan Tatar ictimaği üzägenä qarata april azağında mäxkämä eşe açıluı xaqında xäbär itelgän ide inde. Radio tıñlawçılarnıñ xäterenä töşerep ütäbez: Rusiä Yüstitsiä ministrlığınıñ Başqortstan buyınça Baş idaräse Başqortstan Tatar ictimaği üzäge eşçänlegen tikşerü maqsatında, Ufanıñ Kirov rayonı mäxkämäsenä möräcägät itte. Ul möräcägättä äytelüençä, Tatar ictimaği üzäge räsmi terkälü ütmiçä eşli ikän häm uzğan yıldağı eşçänlege turında xisap tapşırmağan ikän. Belderelgän däğwalarnıñ citdi bulmawın iskärtep mäxkämä utırışına qädär ük Tatar ictimaği üzäge räise Ayrat Ğiniätullin alarnı kire qaqqan ide. İke tapqır uzğan mäxkämä utırışlarında da ul üzeneñ dälillären kiterep, barlıq ğäiplärgä qarata üzeneñ dälille añlatmaların birgän. Ämma, mäxkämä eşeneñ beraz tuqtalıp torğannan soñ, yañadan başlanaçağı mäğlüm buldı. Azatlıq radiosına Ayrat Ğiniätullin tübändägelärne xäbär itte. Sitata:«Mine başqalanıñ Kirov rayonı mäxkämäsenä 6 yün irtäsendä tağın çirattağı utırışqa çaqırıp xat cibärdelär. Anda Tatar ictimağıy üzägenä qarata elek ük taşlanğan ğäyeplär buyınça añlatmalar taläp itelä». Ayrat Ğiniätullin Başqortstan Tatar ictimaği üzägenä qarata mäxkämä eşe açunı maxsus eşlängän ğämäl dip isäpli. Tatar ictimağıy üzäge eşçänlegen tuqtatu, anı yabu öçen kürsätmä alınğanlığın xätta qayber xoquq saqlawçılar üzläre dä yäşermi, di Ayrat äfände. Monıñ öçen qayber işarälär dä bar. Başqortstan proqurorı Qonowalov ta, Rusiä Federäl iminlek xezmäteneñ Başqortstan buyınça idaräse citäkçese Çernoqov äfände dä respubliknıñ Berläşkän opozıytsiäsenä kerüçe qayber cämägätçelek oyışmalarınıñ eşçänlege tıyılu ixtimallığı xaqında beldergän ide. Ä Başqortstan Tatar ictimağıy üzäge oppozitsiä köçläre safında aqtiv eşçänlek alıp bara.

XS
SM
MD
LG