Şuşı atnada, Qazanda çığuçı internet jurnalda, anıñ adresı http://gazeta.etatar.ru/news/view/8/13088. Tatar internetı turında mäqälä basılıp çıqtı. Urıs telle şuşı jurnal, «Tatnet» oyışmasınıñ tatar domenın buldıru turındağı söyläşüen kürep alğan, häm tatar millätçeläre domen sorıy dip ğäcäplänep yazğan, başta internetçılarnıñ fikeren soraşqan.
«Tatar internetı» digän xalıqara oyışma, Tatarstannıñ global çeltärendäge üz öleşen, üz bilgesen buldıru öçen, yuğarı däräcädäge «ts» digän domennı, ansı bulmasa, kommersiä nigezendä birelä torğan, tübänräk däräcäle «tat» domenın sorıy. Bu xaqtağı cömlälär Tatnet forumnarınıñ axırğı eş käğäzlärendä daimi kertelep bara häm bu xaqta «Tatnet» tapşıruı da söylägän ide. www.etatar.ru internet jurnal xäbärçese «Yandex» şirkäte wäkileneñ fikeren sorağan. Andrey Serbant äytüençä, tatar xalqınıñ dönya buylap çäçelüen iskä alğanda, ikençe däräcäle «tat» domenı populyarlıq qazanırğa mömkin. Ayırım domennı sorawnı ul, säyäsi adım dip atıy häm ul milli berdämlek turında söyli, di «Yandex» şirkäte wäkile. Domennarnı terkäwçe şirkät wäkile Svetlana Prozorova, Tatarstanğa iñ yuğarı däräcäle milli domen birelü mömkinlegenä şik beldergän. Ä «internetta isemnär häm sannar belän idärä itüçe xalıqara oyışma»nıñ matbuğat särkätibe añlatqança, Tatarstanğa ikençe däräcäle domen alu awır bulmayaçaq, anıñ öçen Rusiä däwlät belän kileşterü dä taläp itelmi, respublikağa bu xaqta möräcäğät itärgä, ber nindi säbäp qomaçawlamıy, dip cawap birgän.
İnde xäzer Tatarstan xökümäteneñ bu mäs’älägä qaraşın beleşergä qala. Elemtä ministrlığı Färit Fazılcanov, domen alu mäs’äläsen xuplamasa da, qarşılığın beldermägän ide.
İnternetta iñ aktiv keşe beläsezme kem? «Ürmäküç», digän keşe barlıq tatar forumnarındağı yazularnı sanap, avtorlarnıñ aktivlığın isäpkä alıp, «Tatnet pulsı» digän säxifädä mäğlümatlarnı iğlan itte. Tatar forumnarında xäbärlärneñ sanı 100 mängä kilep citä, iñ küp yazuçı keşe «Raxmetov» äfände. Belgänegezçä, bu Aynur Sibğatullinnıñ internettağı iseme. Ul mäsälän, 4 meñnän artıq xäbär yazıp qaldırğan, Annan ikençe urında «Rinat Piterskiy» bara, ul 2 meñnän artıq yazu qaldırğan, annan soñ «Millätçe» häm «Nogay» isemle tatnetçılarnı kürep bula. Alar da 2meñ tapqır fikerlären beldergän.
Bikä Timerova.
