Accessibility links

Кайнар хәбәр

Awıl sabantuyğa äzerlänä


31 mayda Tatarstan respublikası ministrlar kabinetında bulıp uzğan brifingta Sabantuy bäyrämnären ütkärü buyınça barlıq äzerlek eşläre tämamlandı dip beldergännär ide. Belgänebezçä, rayon üzäklärendä, awıllarda älege bäyräm 4-5 iyün könnärendä ütkäreläçäk. Ä äzerleklär çınnan da bette mikän soñ?! Mamadış, Piträç rayon gäcite redaksiäläre jurnalistları traditsion bäyrämgä äzerleklär bette, xalıq bäyrämne genä kötä inde dip belderdelär. Dörestäendä, bälki betkänder dä, çönki alarda kolxoz-sovxozlar ayaqlarında älegä nıq basıp toralar. Anıñ östenä bay investorlar da yärdäm itä. Ä menä kolxozları taralğan, investorlardan da çittä qalğan awıllarnıñ xäle niçek ikän soñ? Balıq bistäse rayonında Küki, Yamaş, Baltaç awılları berniçä yıl elek ber kolxoz bulıp yäşäp yatalar ide. Läkin alarnı tarattılar. Xäzer härberse üz könen üze kürergä duçar.

Küki awılında xalıq -söt-may satıp, kürşe rayonnarğa tözeleştä eşläp kön kürä. Awılda 750 keşe yäşi. Ğomumi mäydanı qırları, bolınnarı, urmannarı belän barsı 2000 gektar. Kümäk xucalıq taratılğan. Şuña kürä awılda törle çaralar, şul isäptän Sabantuynı ütkärü dä cirle üzidarä sovetı qulında qalğan. Küki cirle üzidarä räise Mäwlä İsxaqov söyli:

M.İ Çınnan da moña qädär Küki, Yamaş, Baltaç awılları ber kümäk xucalıq bulıp yäşädelär. Ul waqıtta inde öç brigadanıñ eşe betkäç, başta berençe annan qalğannarında oyıştırıla ide inde Sabantuylar

R.İ Kümäk xucalıq bulğan waqıtta Sabantuynı ütkärü ciñel ideme?

M.İ Äye, ul waqıtta çınnan da ciñel ide. Kolxoznıñ aldınğı belgeçläre bar ide. Şuña kürä saban eşlärenä näticä bularaq ul yıllıq eşlärebezgä yomğaq yasaldı. Sabantuy zur eşlärdän soñ därt östäw mizgele bulıp tordı. Çönki härber tarmaq buyınça aldınğılar büläkländelär. Xäzer bezneñ Kükidä Gimayevnıñ, Näbievnıñ, Gälievnıñ fermer xucalıqları tuıp utıralar. Alarğa da elekke traditsiäne däwam itü maqsatı belän cir belän eşlägän keşelärneñ xezmäten bäyrämdä kürsätergä kiräk dip yünäleş birdem. Aqçalata birelmäsä dä awıl cirendä naturalata birü kiñ taralğan. Mäsälän peçän, ikmäk häm başqalar. Şuña kürä ber genä eşçene dä iğtibarsız qaldırmasqa ide inde

R.İ Ä awıl xalqınıñ milli bäyrämgä öleş kertä soñ?

M.İ Kiäwgä çıqqan kilennär çikkän qulyawlıq, çikkän sölgelär äzerlilär. Sabantuyda yäş kiäw belän käläşneñ büläge bula inde bezdä. Xalıq üzeneñ yomırqasın, aqçasın häm şulay uq bäyrämgä dip maxsus bülägen tapşıra. Ğömer-ğomertennän tatar xalqı tegärgä-çigärgä yaratqan şuña da çigelgän sölgelärne aldan uq äzerläp quyalar.

R.İ Küki Sabantuyın ütkärü yaqınça küpmegä töşä? Älege çaranı ütkärü öçen byudjettan aqça bülep birü çınnan da yuqmı ul?

M.İ Yaqınça Küki Sabantuyın uzdırır öçen kimendä 15-20 meñ aqça kiräk. Bäyrämgä dip byudjettan bernindi dä aqça bülep birelmäde, birelä disälär dä bezgä qädär barıp citkäne bulmadı. Şuña kürä cirle iğänäçelär, xalıq yärdäme belän Sabantuylar ütkäräbez. Şulay uq cirle üzidarä üz bülägen äzerli, Küki urman xucalığı soñğı yıllarda iñ yumart iğänäçelärneñ bersenä äwerelep bara. Xäzerge waqıtta citäkçe urınnarda eşläwçe awıldaşlarıbızğa möräcäğät itäbez, alar qullarınnan kilgänçä yärdäm itep kilälär.

R.İ Şulay da milli bäyrämne ütkärüneñ töp awırlığın sez närsädä küräsez?

M.İ Sabantuynı uzdırmasaq niçekter yäşäyeş betkän kebek inde ul. Bu problema xökümätneñ üz sisteması bulğan waqıtta härber närsä bilgele ide. Ä bit bügengese köndä bilgesezlek xökem sörä. Barsında ezlärgä, tabırğa, şaqtıy köç sarıf ietergä kiräk

Sabantuy, sabantuy dibez, ä bit ul milli traditsiälärne däwam itü bäyräme genä tügel ikän. Awıl xalqınıñ kolxozlar taraluğa qaramastan, iğänäçelär tabıp, tırışıp-tırmaşıp ğöref-ğadät, yolalarnıñ däwamın çağıldıruçı çara bulıp tora. Bu küreneşlär küplärne borçığan tatar awıllarınıñ kiläçäge barmı digän sorawğa cawap bula alır ide?

Röstäm İsxaqi

XS
SM
MD
LG