Accessibility links

якшәмбе, 11 декабрь 2016, Казан вакыты 16:46

Tarixta berençe tapqır Sverdlovski ölkä sabantuyı uzdırılaçaq


Sverdlovski ölkäse tarixında berençe tapqır zur masştablı ölkä sabantuyı uzdırılaçaq. Sverdlovski ölkäsendä sabantuylarğa äzerlek bara. Tatar awıllarında, rayonnarda, küp kenä şähärlärdä, Yekaterinburgnıñ üzendä yıl sayın uzdırıla torğan ğädättäge sabantuylardan tış, tarixta berençe tapqır, bıyıl Sverdlovski ölkä sabantuyı oyıştırılaçaq.

Äle yazğa kergäç tä, Yekaterinburgta eşläp kilüçe Milli mediaxolding citäkçeläre, Qazannıñ meñyıllığına bağışlap ölkä sabantuyı uzdıru turındağı täqdim belän ölkä xökümätenä çıqqannar ide. Ozaqlamıy Sverdlovski ölkä xökümäte räise Aleksey Vorob''yev imzası astında maxsus qarar qabul itelde. Xökümät citäkçese raslağan wäqälätle oyıştıru komitetına Tatarstan häm Başqortstan respublikalarınıñ Sverdlovski ölkäsendäge daimi wäkilläre, xökümät äğzaları, ministrlar, deputatlar häm bu eşkä başlanğıç birüçelär kertelde.

Oyıştıru komitetı räise, Sverdlovski ölkä xökümäte citäkçese urınbasarı Semen İsakoviç Spektor berençe utırışta uq bu waqiğanıñ bik zur säyäsi ähämiätkä iä buluın assızıqladı. Anıñ äytüençä, Rusiäneñ berlege, nıqlığı, köçe millätlär duslığında. Qızğanıç, qayber köçlärneñ bu berlekne qaqşatırğa tırışuları arqasında, soñğı yıllarda millätara mönäsäbätlär kiskenläşä baruın kürmi mömkin tügel. “Niçek kenä tel äylänmäsä dä, ildä üzenä kürä grajdannar suğışı bara ikänlekne istän çığarmasqa kiräk. Äledän-äle terror çatqıları äle anda, äle monda qabınıp kitä. Şuşındıy waqıtta ölkädä yäşäwçe tatar xalqı, qolaç cäyep başqalarnı üzeneñ milli bäyrämenä qunaqqa çaqıra ikän, bu eşkä bez bik räxätlänep, barlıq cawaplılıqnı toyıp quşılırğa tieşbez”.

Spektor äfände utırışta qatnaşuçılarnı bäyrämne oyıştırğanda barlıq neçkäleklärne küzdä totıp eş itärgä çaqırdı. Här ministrlıqqa cawaplı wazifalar yöklände.

Bar xalıqnıñ da yaratqan bäyrämenä äwerelgän Sabantuy Sverdlovski ölkäsendä mondıy masştabta äle berençe tapqır oeştırılaçaq. Şuña kürä, bäyrämneñ milli tösmerlären bozmıyça, başqa millät xalıqları qatnaşırlıq itep tä oyıştıru küzdä totıla.

Ölkä sabantuyın ütkärü urını itep, Yekaterinburgtan 40 çaqırımda urnaşqan, Pervoural''ski şähärennän yıraq tügel, Şaytan yılğası yarındağı “Polonnıy ğorqa” dip atalğan bik matur cir bilgelände. Bügenge köndä ölkä sabantuyın äzerläw buyınça bik zur qolaçlı eş cäyelderep cibärelde. Sverdlovski ölkä sabantuyı 25 iyündä uzdırılaçaq.

XS
SM
MD
LG