Accessibility links

чәршәмбе, 7 декабрь 2016, Казан вакыты 11:41

Bulanaş bistäsendä Qazannıñ meñyıllığına bağışlanğan räsemnär konkursı ütte


Bulanaş bistäsendä Qazannıñ meñyıllığına bağışlanğan räsemnär konkursı yomğaqlandı. Monnan ber yıl elek Sverdlovski ölkäseneñ Bulanaş digän şaxterlar bistäsendä “Meñyıllıqqa – meñ räsem” digän isem astında bäyge iğlan itelgän ide. Bu könnärdä bäygene yomğaqlaw tantanası bulıp uzdı.

Meñ ük bulmasa da, bäygedä küp kenä balalar qatnaşqan. Şunısı qızıq, räsem yasawçılar arasında Qazan turında bäyge başlanğaç qına işetep belgän balalar da bar. Şuña qaramastan, älege räsemnärne küzätep yörgändä, yäş rässamnarnıñ nindider eçke toyımlawı bulğanlığın kürep xäyran qalırlıq. Gallämov Aydar Söyembikä manarasın surätlägändä anıñ mähabätlegen, böyeklegen birä alğan. Neçay Oksana tatar milli kieme kigän biyuçe qız räsemen yasağan. Ukrain qızı tatar milli kiem ürnägen yaña tösmerlär belän bayıtıp birgän.

Ğomumän, iğtibarğa layıqlı räsemnär bik küp biredä. Jyuri yaxşılardan-yaxşı un räsem saylap aldı. Ciñep çığuçı yäş rässamnarnı büläklärgä dip Yekaterinburg şähärennän Milli mediaxolding citäkçeläre häm Tatarstannıñ Uraldağı daimi wäkile urınbasarı Xäydär Gıyl''fanov kilgän ide.

Tantanada Bulanaş tatar yäkşämbe mäktäbenä yörüçe balalar çığış yasadı. Alar zalda cıyıluçılarğa bik matur itep Qazan şähäre turında, anıñ bay tarixı, bügenge köne turında söylädelär, tatar telendä cırlar cırladılar, biedelär. Annan soñ Milli mediaxolding citäkçeläre ciñep çıqqan balalarğa aqçalata büläklär tapşırdı. Jyuri qararı buyınça, räsemnärneñ iñ yaxşısı dip Söyembikä manarası töşkän räsem tabıldı. Anı yasawçı 11 yäşlek Aydar Gallämov Qazan şähärendä oyıştırılaçaq “Millätebez xäzinäläre” dip atalğan lager''ğa yal itärgä baru öçen putevqa belän büläklände. Aydarnıñ küptänge xıyalı tormışqa aştı – ul Qazanğa baru bäxetenä ireşte. “Minem Qazanda Kreml''ne, Söyembikä manarasın, prezidentnı küräsem kilä”, - di Aydar.

Ural tawlarınıñ yıraq poçmağında urnaşqan Bulanaş şaxterlar bistäsendä yäşäwçe törle millät balaları, şulay itep, yıraqtan torıp bulsa da, Qazan belän tanıştılar. Qatnaşuçılar bu bäyrämne oyıştıruçı Bulanaş balalar icatı yortı direktorı Valentina Menşininağa räxmät belderdelär.

Fäwiä Safiullina Yekaterinburg

XS
SM
MD
LG