Accessibility links

чәршәмбе, 7 декабрь 2016, Казан вакыты 15:27

Rusiädä Yäşellär Partiäse tözelde


Yäkşämbedä Russiäneñ törle töbäklärennän ekologistlar Mäskäv çitentä oçraşıp yaña politik partiä, Jäşellärneñ Berlegen, oyıştırdılar. Anıñ citäkçese atom-töş iminlege buyınça tanılğan belgeç Aleksey Yablokov , partiäneñ maqsäte Russiälelärneñ sälämätleräk möhitta yäşäv xoquqı öçen köräşü bulıp tora dip belderde. Ul Yäşellär Berlege Germaniädäge ekologistlar kebek uñışqa ireşep töp politik köçkä äylänerlär digän ömet belderde.

Rusiäneñ tanılğan jäşelläre yaña partiäneñ xartiäsen rasladılar häm citäkçesen sayladılar. Jäşellär Berlege partiäseneñ citäkçese Yablokov , tabiği mohitnı saqlau turında qanunnarnıñ qabul itelüe öçen Rusiä ekologistları politik köç xälenä kilergä tieşlär dip belderde.

Audio

"Bez Rusiädäge yäşellär xäräkäteneñ politik qanatı bulğan Rusiä Yäşellär Berlegen oyıştırabız. Xakimiätlärgä politik basım bulmıyça torıp, Rusiädäge sotsial häm ekologik problemmalarnı näticäle xäl itep bulmıy. Vatandaşlarnıñ sälämät möhittä sälämät köyençä yäşäv xoquqın ğämälgä quyu bezneñ töp maqsätıbız."

Partiä 2007-çe yılda bulaçaq Duma saylaularında, şulay uq cirle saylaularda da qatnaşunı planlıy. Yablokov Berdäm Rusiä öçtän ike küpçelekkä iä bulğan Dävlät Dumasında küpçelekkä iä bulırğa ömetlänmäven dä äytte. Läkin, ul ber kön kiler Rusiäneñ Yäşellär Berlege dä Germaniädäge Jäşellär Partiäse kebek politik täsirgä iä bulır dip ışana.

Audio

"Älbättä, bez Dumada küpçelekkä iä bula almayaçaqbız. Läkin, Germaniädä bulğanı kebek bezsez qanunnar qabul itelä almaslıq töp partner xälenä kilä alırbız. Germaniäneñ Yäşellär Partiäse zur tügel. 12-15 protsent . Läkin, alarnıñ yaqlauınan tış qararlar qabul itelä almıy. Bez bu täcribäne qabatlarğa telibez."

Partiä oyıştırıluınıñ ikençe könendä ük qayber qıyınlıqlarğa oçradı. Kreml küzätünedä bulğan räsmi terkälü mäsäläsendä. Yäşellär Berlegen liberal Yabloko partiäsä yaqlıy. Yabloko räiseneñ urınbasarı Sergey Mitroxin Yäkşämbe ciınında yasağan çığışında xakimiätlär yaña partiägä problemmalar çığaraçaq dip kötärgä kiräk dide.

Audio

"Bez sezneñ belän här törle xezmättäşlekkä äzer. Läkin, qayber säbäplärdän monıñ bulmauı mömkin. Töp säbäp burokratlarnıñ ekologik xäräkätlärne yaratmauı häm alarnıñ mondıy oyışmalarnıñ tözelüenä qomaçaulau mömkinlekläreneñ buluı."

Yablokovnıñ öç urınbasareınıñ bers- Aleksander Nikitin. Ul Rusiäneñ tönyaq flotındağı atom häläkäte qurqınıçı turında Norveg Fondı öçen raport äzerlägäne öçen 1996-nçe yılda vatanğa xıyanät itüdä ğäyeplände. Rusiä Yuğarı Mäxkämäse 2000-nçe yılda anı aqladı. Nikitin Düşämbedä radiobız xäbärçesenä Yäşellär Berlege Russiädäge berençe çın ekologik partiä bulaçaq dip belderde.

Audio

"Moñarçı Rusiädä yäşellär partiäse yuq ide. Tormış Partiäse bar. Läkin ul rulısınça Kremldän bäyle. Bez monı telämibez. Partiä tübännän, ekologist berläşmälärennän tözelde, läkin, ul ekologistlardan ğına tormıy. Ul şulay uq , anti militarist . pasifist. Bez bu kiñ törkemdäge keşelär bezne yaqlar dip xisaplıybız."

Rusiädä bügenge köndä 60 ekologist oyışma terkälgän. Alarnıñ tanılğannarı xökümätneñ vatandaşlarnıñ sälämätlegenä häm tabiği möhitqa zian kitergän qararların yış qına tänqitlilär.

Färit İdelle, Praga.
XS
SM
MD
LG