Mäskäw dairäläre “V. İ. Lenin tıyulığı” eşçänlege belän qızıqsına başladılar. Cirle küzätüçelär fikerençä, bu tıyulıq qaramağındağı şähär üzägeneñ 170 gektar cire yaña tözeleşlär öçen zur qızıqsınu tudıra. Ul''yanov-Leninnıñ abruyı töşüe dä anıñ tarafdarların tıyulıqnıñ kiläçäge turında borçuğa sala. Ä Sember xalqına Leninnan başqa da tabınu obyektları tabıla tora. Semberneñ üz svyatoe Andrey Blajennıynı (Santıy Andrey) izgeläştergän kön bäyräm itelde.
Däwlät Duması deputatı Valentin İvanov ölkäneñ öç töp xalqı avtonomiäläre häm bu tellärdäge gäzitlär citäkçeläre belän oçraştı. Ul, gäzitlär çığaruda matdi yärdäm sorap, Tatarstan, Çuaşstan, Mordoviä citäkçelegenä möräcäğät itärgä kiräk, dide. Läkin bu fiker kire qağıldı.
Oçraşuda Avtonomiä räise wazifaların waqıtlıça başqaruçı Roza Äxmätcanova küñelleräk xäbär dä ireşterde. Mäläkäs şähäreneñ kabel'' televideniesendä “Yaña ğasır” kanalı qabul itü mömkinlekläre tudırıla. Şuşı kanal qısalarında tatar telendä cirle tapşırular oyıştıru östendä eş alıp barıla.
Sember ölkäseneñ baytaq tatar tele uqıtuçıları Tatarstannıñ Bua şähärendä maxsus oyıştırılğan seminarda qatnaştılar. Sember uqıtuçıları yaña texnologiä qullanu ısulları belän tanıştılar häm alğan sabaqnı köndälektä qullanu öçen tırışırğa digän fikergä kildelär. Tik menä Tatarstandağı kebek şartlar bulmawı beraz küñelne tırnıy, diyuçelär dä buldı.
Uqu yılı tämamlanu aldınnan Ul''yan däwlät pedagogiä universitetınıñ tatar bülekçäse talibäläre cirle tatar zıyalıları belän oçraştılar. Çaranıñ maqsatı – yäşäyeş mäğnäse, millätebezneñ, bigräk tä ana teleneñ kiläçäge, zamana şawqımnarı turında fiker alışu ide.
Cirle avtonomiä ölkä üzäge rayonnarında avtonomiäneñ bülekçälären oyıştırunı däwam itä. Zöyaaryağı rayonınnan soñ, şundıy uq çara Lenin rayonında uzdı. Rayon başlığı Aleksandr Buqin, Ölkä avtonomiäse citäkçelege çaqırıp ta, Avtonomiäneñ rayon sovetına saylanuğa bilgelängän şäxeslärneñ kilmäwenä ğäcäplänep, zur rizasızlıq belderde.
Ölkä üzägeneñ Sverdlov isemendäge yal parkında tatar balaları bäyräme uzdı. Balalar baqçalarında, mäktäplärdä az-maz milli mädäniätebez belän şöğellänüçe balalar üz sälätlären kürsättelär: cırladılar, biedelär, şiğerlär söylädelär, bayanda, skripkada uynadılar. Ä rässam Güzäl Äxmädullina balalar arasında asfal''tta räsem yasaw bäygese oyıştırdı.
Şunısı möhim: çarağa keşe küp cıyılğan ide.
“Azatlıq” radiosı, Ayrat İbrahim, Sember.
