Accessibility links

пәнҗешәмбе, 8 декабрь 2016, Казан вакыты 09:01

«Näürüz» festivalendä töp büläklärne G.Kamal isemendäge akademiä teatrı aldı


Törki xalıqlarnıñ 8nçe «Näwrüz» festivale tämamlandı. Qazan tamaşaçıları törki xalıqlarnıñ teatrları belän, tağın 4 yılda soñ ğına oçraşaçaq. Ä älegä teatr bäyrämennän qalğan tä’sirlär, istäleklär äle yuılmağan. 5 yun kiçendä Ğäliäskär Kamal teatrında «Näwrüz» festivalendä ciñüçelärne büläkläw çarası ütte. Berençe näticä şul -

«Näwrüz» festivaleneñ töp büläklären Kamal teatrı aldı. Festival 1 atna bardı, 18 spektakl uynaldı, törle şähärlärneñ tänqitçeläre, artistları oçraştı. İnde jyuriga kergän bilgele sänğät ähelläre, rejiserlar, başqa törki respublikanıñ mädäniät ministrları häm bilgele tänqitçelär «Xörriät qoşı» räweşendä eşlängän sınnarnı tapşırdı. Jyuri wäkilläre dä, tänqitçelär dä, märxüm rejisser Marsel Sälimcanovnı küp tapqır, ostalıq ürnäge ide, yaxşı dus ide, dip itep iskä aldı.

Ul saylap alğan «Qara çikmän» äsären iñ yaxşı spektakl itep büläklädelär. Marsel Salimcanov ostazlıq itkän Färit Bikçäntayıvqa da «iñ yaxşı rejisser» digän Näwrüz büläge birelde. Märxüm rejissernıñ qul astında eşlägän yäş akter İskändär Xäyrullin, irlär arasında, iñ yaxşı rol başqarğan artist bularaq büläklände. Şul uq, «Qara Çikmän» äsäreneñ säxnä bizäleşen eşlägän Sergey Skomoroxov festivalneñ «iñ yaxşı rässamı» digän isem aldı. Şuşı uq äsärdä töp rol’ne başqarğan Rinat Tacetdinov, «TURKSOY» oyışmasınıñ maxsus bülägen aldı. Ä G.Kamal teatrınıñ direktorı Şamil Zakirovqa, ««Näwrüz» festivalen üsterügä kertkän öleşe öçen», maxsus büläk birelde. Festival’dä başqa teatr artistları da büläklände. Çuaş däwlät akademiä teatrı rejisserı Valeriy Yakovlev, «İñ yaxşı rejisser» digän «Näwrüz» bülägen aldı. Ul quyğan «Bernarda Alba yortı» äsärendä töp röllärne başqarğan 2 xanımğa da, «xatın-qızlar arasında iñ yaxşı rol» häm «ikençe plan role» öçen «Xörriät qoşı» sını birelde. İskändär Xäyrullin belän bergä, ir-at akterlardan iñ yaxşı rol başqarğan öçen, Qızıl orda ölkä teatrı artistı Ruslan Äxmätov «Näwrüz» bülägen yawlap aldı. Qırğız teatrı kürsätkän «Lir patşa » äsäre öçen, Qırğız artistların ike tapqır säxnägä çıqtı. Anda töp rollärne başqarğan artistlar, Jyurinıñ häm tänqitçelär kollegiäseneñ maxsus büläkläre belän bilgeläp ütelde. Kärim Tinçurin isemendäge teatr täqdim itkän «Ay bulmasa, yoldız bar» digän säxnä äsäre, jyuri tarafınnan, iğtibarsız qaldı diärlek. Barı älege äsärdä töp rol’ne başqarğan Cämilä Äsfandiarova, «yäş başqaruçınıñ uñışı öçen» «Xörriät» qoşın aldı. Yäş akterlarğa birelä torğan bu büläk, Orenbur tatar teatrı artistı Ayrat Wahitovqa eläkte tağın. Başqort akademiä teatrı «Näwrüz»dä Mostay Kärimneñ «Ozın-ozaq balaçaq» digän bilgele äsären kürsätte. Anı berençe tapqır, rejisser Rifqät İsrafilov quyğan bulğan. Festival’dä, ul juri äğzäse bularaq, xäzerge rejisser eşenä bäyä birde. Tänqitçelär äsärgä, rejisser qullanğan alımnarğa yuğarı bäyä birde. Ämma jyuri äğzäläre, Başqort akademiä teatrın «Rejisser debutı öçen», digän maxsus diplom belän genä büläklände. Ufanıñ «Nur» tatar teatrı da büläksez qaldı. Alar kürsätkän «Öç señel.Yıllar uzğaç» digän spektakle belän skandal kilep çıqtı. Litvadan Linas Marius Zaykauskas häm Polşadan Bojena Kostashevska, «Nur» teatrında Çexov äsäreneñ däwam itep, «Öç señel. Yıllar uzğaç» digän pyesanı säxnäläştergän bulğan. Jyuri äğzäse häm «Teatr tormışı» digän jurnalnıñ baş möxärrire Oleg Pivovarov, avtorlarnı başqa spektakl’lärdän qayber öleşlärne urlawda, klassik äsärneñ temasın mäğnäsez däwam itelüdä ğäyıpläde. Ämma bu belderü genä bäyräm itüçelärne käyefen töşermäde. Törki xalıq teatrları ällä nindi zur büläklär almasalar da, säxnägä çığıp, böyek törkilärneñ yawları xaqında söyläde, böyek altay xalıqları turında elektr dumbrağa quşılıp cırladı. Tıva artistları zamança muzıkağa salınğan ızlaw belän sälämläde. «Näwrüz» festivalendä töp ciñüçelär bilgelände, ämma «iñ yaxşı milli dramaturg», «iñ yaxşı kompozitor» häm «tamaşaçılar mäxäbbäten yawlağan keşe yäki spektakl» digän büläk birelmi qaldı.

Bikä Timerova.

XS
SM
MD
LG