Accessibility links

җомга, 9 декабрь 2016, Казан вакыты 16:50

Balalarnıñ milli cır bäyräme


Sverdlovski ölkäsendä mädäniät ministrlığı tarafınnan här ike yıl sayın uzdırıla torğan milli mädäniätlär festivale däwam itä. Festival' qısalarında küptän tügel törle millät balalarınıñ cır bäyräme bulıp uzdı. Bäyrämneñ xucaları bulıp “Kügärçen” isemle balalar ürnäk fol'klor ansamble tordı.

Yämle cäy citü, cäyge yal başlanu uñayı belän, alar başqa kollektivlarnı “Qarğa botqası” bäyrämenä çaqırdılar. Kiçä “Kügärçen” ansambleneñ başqort häm tatar xalqınıñ borınğı bäyräme – Qarğa botqasın uzdırunı gäwdäländergän teatral küreneş kürsätüe belän başlanıp kitte. Annan soñ süz qunaqlarğa birelde. Biredä Krasnoufim rayonınıñ Yuva digän mari awılınnan kilgän “Şip Pamaş” ansamble, Alapay şähärennän “Çulpan” ansamble, Severoural'skidan “Duslıq” ansamble, Yekaterinburgtan ike törle rus ansamble häm başqalar qatnaştı.

Tamaşaçını iñ soqlandırğanı, iñ quandırğanı Alapaydan kilgän “Çulpan” balalar ansamble buldı. Yekaterinburg tamaşaçısına kürsätergä dip, alar Sabantuy bäyräme turında muzıykal küreneş äzerlägännär. Milli bäyräm yolalarınıñ barısı da – birnä cıyu diseñme, törle şayan uyınnar diseñme, köräş diseñme – matur biyu ürnäkläre belän säxnägä quyılğan. Balalarnıñ ayaqlarına küz iärmi. Borınğı rus şähäre Alapayda şulay çın tatarça, osta itep bii belä torğan balalarnı kürep soqlanmıy mömkin tügel.

Ansambl'neñ citäkçese Naciä xanım Safiullina äytüençä, monnan 6 yıl elek oyıştırılğan “Çulpan” ansamblenä 7 yäştän 15 yäşkä qädär bulğan törle millät balaları yöri. Şähär xakimiäte ansambl'gä törle yaqlap yärdäm itep torırğa tırışa. Mädäniät yortı binasında alarğa zur ğına, zamança tözekländerelgän bülmä birelgän. Citäkçe xezmät xaqı alıp eşli. Rayon buylap uzdırılğan barlıq çaralarda da bik teläp qatnaşalar “Çulpan” balaları. Çığış yasağan sayın, alarğa aqça da bülep birelä ikän. Eşlägän aqçaların äräm-şäräm itmiçä, bik matur milli kostyumnar tektergännär. Naciä xanım, balalarnıñ küñelen tağın da üsterü öçen, alarnı başqa töbäklärgä häm tarixi Watanıbız Qazanğa alıp baru teläge belän yanıp yäşi.

Bäyrämdä qatnaşuçılar arasında ölkäneñ yıraq tönyaq şähäre – Severoural'skidan birle kilgän balalar ansamble bar ide. Anıñ citäkçese Rämilä xanım Musina söyläwençä, “Duslıq” ansamble 7 yıl eşli ikän inde. Ämma sıyfat yağınnan ul bik nıq üzgärgän, elekkege ansambl' tarqalğaç, küptän tügel anı yañadan ayaqqa bastırğannar. İnde “Duslıq” balalar ansamblenä äwerelgän. Ansaml'gä 8 bala yöri ikän. Şähär mädäniät bülege quldan kilgänçä yärdäm itep torırğa tırışa. Ämma bu yärdäm älegä mädäniät yortınnan ayırım bülmä birüdän ğibarät. Kostyumnarnı Rämilä xanım üze tekkän. “Duslıq”nıñ xalıq aldında berençe çığış yasawları.

Bäyrämdä qatnaşuçı kollektivlarnı Tatarstannıñ Uraldağı daimi wäkile Rawil Bikbov sälämläde. Ul balalarğa ballı prizlar da alıp kilgän ide.

Milli mädäniätlär festivale qısalarında balalar milli kollektivlarına şundıy iğtibar birelüe bik quanıçlı xäl. Bu milli mädäniätәrnıñ kiläçäge bar ikänlegen kürsätä.

Fäwiä Safiullina Yekaterinburg.

XS
SM
MD
LG