Accessibility links

пәнҗешәмбе, 8 декабрь 2016, Казан вакыты 07:10

Äfğanstanda totıq itep alınğan yardäm xezmätkäre Clementina Cantoni azat itelde häm İtaliägä qayttı


Äfğanstanda öç atna buyı bilgesez törkem tarafınnan urlanıp totılğan italian yardäm xezmätkäre Clementina Cantoni comğağa qarşı töndä azat itelde. Prezident Xämit Qarzay monı eçke eşlär ministrlığı, iminlek köçläre häm äfğan qabilä başlıqlarınıñ urtaq xezmättäşlege näticäse dip bäyäläde. Äfğanstan xökümäte berük waqıtta, Cantonine azat itü öçen nindä dä bulsa yolım tüläwen kire qağa.

32 yäşlek Clementina Cantonineñ nihayät azat buluın pänceşämbe kiçen Äfğanstannıñ eçke eşlär ministrı Ğali Äxmät Cälali üze xäbär itte:

Audio, Ğali Äxmät Cälali

"Zur qänäğätlänü xise belän min bezneñ bügen kiç, 24 kön elek Qabulda ber cinayätçel törkem tarafınnan totıq itep alınğan Clementina Cantonine azat itüebezne citkeräm" di äfğan eçke eşlär ministrı. Cantonineñ sälämätlege yaxşı, comğağa qarşı tönne ul Qabuldağı italian ilçelegendä ütkärde dip xäbär itelä. Urlanu aldınnan Cantoni, 10 meñläp tol xatınğa häm alarnıñ balalarına yardäm itkän maxsus proyekt belän şöğellänä ide, ä Äfğanstanda ul 2002-nçe yıldan birle yäşi. Cantoni 16-nçı mayda Qabul üzägendä maşinasınnan urlanğan ide. Monıñ kemnär tarafınnan eşlänüe äle dä bilgele tügel, äfğan xakimiate barı tik, bu ber cinayätçel törkem dip kenä belderä. Äfğan xatınnarına yardäm itüe belän kiñ tanılğan häm zur abruy qazanğan Cantonine azat itügä üzeneñ nıq şatlanuın Äfğanstan prezidentı Xämit Qarzay da äytte, üz belderüendä ul "totıq itep alu oçraqların kisken xökem itüen, nindi maqsatlar belän genä añlatılmasın, bu eşneñ cinayätçel ikänlegen citkerä. Äfğanstandağı qayber xäbär agentlıqları, urlawçılarnıñ başlığı Cantonine azat itüneñ şartı itep, üzeneñ törmädä utırğan anasın irekkä çığarunı taläp itkän bulğan, dip xäbär itkän ide. Läkin ilneñ eçke eşlär ministrı italian xatının totıq itep aluçılarğa nindi dä bulsa taşlama yasawın kire qağa.

Audio, Ğali Äxmät Cälali

"Bez qabilä wä mäxällä başlıqlarına bik räxmätlebez, turıdan-turı da, başqalar aşa da bezneñ isemnän söyläşülärdä näq menä alar yardäm itte, şul tırışlıqlarnıñ bergäläşep yasaluı Cantonine azat itügä kiterä aldı", di ministr Cälali. Ul bu eşkä Cantoni yardäm itkän tol xatınnarnıñ da öleş kertüen telgä aldı, alar berniçä märtäbä Qabulda uram cıyınnarı da ütkärgän ide. Clementina Cantonine azat itü bigräk tä anıñ watanı İtaliädä zur şatlıq uyattı. Luxembourgta xäbärçelär belän oçraşqanda italian tışqı eşlär ministrı Gianfranco Fini, "Cantonine urlaw säyäsätkä yä terrorğa bäyle tügel ide, bu çıp-çın ber cinayät ğämäle buldı" dip belderde.

Audio, Gianfranco Fini

Clementina Cantonine urlaw Äfğanstanda eşläwçe yardäm xezmätkärläre arasında iminlek qurquları uyatqan ide. Şunnan soñ ildäge xalıqara oyışmalar üz keşelären uramnarğa çığarmıy ğına eşlätü yulların ezli başladı. Üktäbrdä Berläşkän Millätlärneñ öç xezmätkäre urlanğan ide, alar ber aydan soñ ğına azat itelde. Ul çaqta da Äfğanstan xökümäte, urlawçılar belän bernindi dä kileşü bulmadı, alarğa yolım tülänmäde dip belderde.

Kärim Kamal
XS
SM
MD
LG