Accessibility links

якшәмбе, 11 декабрь 2016, Казан вакыты 07:17

Törkiädäge millättäşlärebez küptän xıyallanğan Bolğarda bulaçaq


Törkiädäge millättäşlärebez İstanbul, İskeşähärdän tarixi watannarı belän tanışırğa 3 köngä kilgännär. Bu säfärne Bötendönya tatar kongressı oyıştırğan. Millättäşlärebezneñ iñ olısına - 75 , ä iñ keçesenä – 26 yäş. Närmin Yaltır Törkiägä kitkän 3нче buın wäkile. “Tatarstanğa kilep citkändä İdel yılğasın kürgäç yöräklärem tetrände. Ata-baba cire”, - dip söyläde Närmin xanım kongressta uzğan oçraşuda:

Babam Törkiägä universitetta uqığanda xatın-qız kiemennän qaça. Başta İstanbul şähärenä urnaşa. Anı oşatmıyça İske Şähärgä kitälär. Gosmaniä awılında cir birälär. Häm anda tatarlar yortların, munçaların salıp töplänep qalalar. Bez 3 tuğan. Keçkenä çaqta äbiem İdeldä yözgäne turında söyli ide. İdel yılğasın kürügä äbiem süzläre iskä töşep üzemne şunda yözgän kebek xis ittem, xisländem bik. Ulım internet aşa mondağı tatarlar belän tanışqan ide. Kiçä alarğa qunaqqa bardıq. Bezne çäk-çäk, göbädiälär belän qarşı aldılar. Küzemä yäşlär kilde.

Tatarstan belän tanışırğa kilgän millättäşlärebez Törkiädäge tatar oyışmalarına yörmilär ikän. Mädäniät, ğöref-ğadätlärne onıtmağannar. Bäyrämnärdä oçraşıp toruların – barlıq milli rizıqlarnı peşerülären äyttelär. Telne kübese belmäsälär dä tatar cırların elekkedän istä qaldırğannarın. Närmin xanım cırlap ta kürsätte.

Yäş buın wäkilläre milli cırlar arqılı tatar telen öyränälär ikän. Yäş millättäşebez İlxan Aqidel Qazanda inde ikençe tapqır buluın äytte:

Min tatar cırların bik yaratam. İnternetta säxifä taptım. Şunda keräm. Äti-äniem tatar. Ämma tatarça naçar belälär.

Sez Törkiädäge 6нчы buın millättäşebez İlxan Aqidelne işettegez.

Millättäşlärebez comğa könne Qazan mäçetlärendä, muzeylarda buldı, Kreml' belän tanıştı. Şimbä könne Arça rayonı Ornaş awılında uzaçaq milli Saban tuyında qatnaşaçaqlar.

Yäkşämbedä, alar İzge Bolğarğa baraçaq. Bu säfärne millättäşlärebez zarığıp kötülären äyttelär. Çönki Bolğar ciren kürü küptänge xıyalları bulğan. Ämma avtobusta tügel, ä su buylap – paromda alıp barsınnar ide digän teläk belderdelär. İdel yılğasın bik küräsebez kilä, dide alar.

“3көн säfärdä genä böten Tatarstan belän tanışıp bulmıy, Qazan bäyrämenä dä çaqırıp qalabız”, - dide oçraşu waqıtında Bötendönya tatar kongressı başqarma komitetı räise Rinat Zakirov.

Landış Xarrasova

XS
SM
MD
LG